జొమాటో చోటు చేసుకోనున్న కీలక పరిణామం
business | Suryaa Desk | Published : Tue, Aug 02, 2022, 11:11 PM
జొమాటో షేర్లు 20 శాతం లాభంలో అప్పర్ సర్క్యూట్‌ను తాకిన ఒక్క రోజులోనే కీలక పరిణామం చోటు చేసుకోబోతుంది. ఈ ఆన్‌లైన్ ఫుడ్ టెక్ కంపెనీకి చెందిన అతిపెద్ద షేర్‌హోల్డర్ అయిన ఒక మిస్టరీ వ్యక్తి 61 కోట్ల షేర్లను ఆఫ్‌లోడ్ చేయబోతున్నారు. ఈ షేర్లను రేపు బ్లాక్ డీల్‌లో అమ్మనున్నట్టు ఈటీ నౌ రిపోర్టు చేసింది. ఈ జొమాటో బ్లాక్ డీల్ సుమారు రూ.2,938 కోట్లకు జరగనున్నట్టు తెలుస్తోంది. పేరు తెలియని ఒక పెద్ద షేర్‌హోల్డర్ ఈ డీల్ చేస్తున్నట్టు రిపోర్టులు వస్తున్నాయి. బ్లాక్ డీల్ ద్వారా జరగబోయే వీటి వాటా కంపెనీలో 7.8 శాతంగా పేర్కొంటున్నాయి.
అయితే ఈ అమ్మకందారుడు ఎవరన్నది మాత్రం మిస్టరీగా ఉంది. అయితే బ్లాక్ డీల్ ద్వారా అమ్మే మేజర్ షేర్‌హోల్డర్ ఉబర్ బీవీగా సీఎన్‌బీసీ టీవీ18 రిపోర్టు చేసింది. ఈ డీల్‌లో ఒక్కో షేరును రూ.48 నుంచి రూ.54 మధ్యలో ఆఫర్ చేయనున్నట్టు తెలుస్తోంది. ప్రస్తుత మార్కెట్ ధరకు ఈ షేరు వాల్యూ 2.8 శాతం నుంచి 13.6 శాతం డిస్కౌంట్‌లో ఉండబోతుంది.
మరోవైపు నేడు జొమాటో షేర్లు రయ్‌మని దూసుకెళ్లిన సంగతి తెలిసిందే. 20 శాతం మేర పెరిగిన షేర్లు నేడు రూ.55.60 వద్ద క్లోజయ్యాయి. అయితే ఈ ఏడాది ఇప్పటి వరకు జొమాటో షేరు ధర భారీగా పతనమైంది. దీంతో ఈ కంపెనీ మార్కెట్ వాల్యూ 60 శాతం కోల్పోయింది. దీపేందర్ గోయల్‌కు చెందిన ఈ కంపెనీ జూన్ క్వార్టర్‌లో నష్టాలను రూ.186 కోట్లకు తగ్గించుకుంది. ఆపరేషన్స్ నుంచి వచ్చిన కన్సాలిడేటెడ్ రెవెన్యూ 67.44 శాతం పెరిగి రూ.1,413.90 కోట్లకు చేరుకుంది.
|
|