ప్లాస్టిక్ కు బదులు..చెక్క ఉత్పత్తులపై రైల్వే నజర్

రైల్వే శాఖ ప్లాస్టిక్ ను పూర్తిగా చెక్ పెట్టే దిశగా సమాలోచనలు చేస్తోంది. ఇదిలావుంటే కేంద్ర ప్రభుత్వం ఇప్పటికే సింగిల్ యూజ్ ప్లాస్టిక్‌పై నిషేధం విధించింది. 21 రకాల ప్లాస్టిక్ ఐటమ్స్‌ తయారీని బ్యాన్ చేసింది. జూలై 1 నుంచి ఈ రూల్స్ అమలులోకి వచ్చాయి. ఈ క్రమంలో ఇప్పుడు ఇండియన్ రైల్వేస్ కేటరింగ్ అండ్ టూరిజం కార్పొరేషన్ (ఐఆర్‌సీటీసీ) కూడా సింగిల్ యూజన్ ప్లాస్టిక్‌పై నిషేధవం విధించాలని నిర్ణయించింది. కేటరింగ్ డిపార్ట్‌మెంట్‌లో సింగిల్ యూజ్ ప్లాస్టిక్ వినియోగం నిషేధం. ప్లేట్స్, స్పూన్స్, కప్స్, గ్లాస్‌లు, ఇతర ప్రొడక్టులకు ఇక ప్లాస్టిక్‌ను ఉపయోగించరు.

రైల్వే అధికారులు ఇప్పటికే ట్రైన్స్‌లో ప్లాస్టిక్ నిషేధంపై ఈ మేరకు కొత్త మార్గదర్శకాలను రూపొందించే పనిలో నిమగ్నమయ్యారు. ప్రత్యామ్నాయ మార్గాలను అన్వేషిస్తున్నారు. రైల్వేస్ ఇకపై ప్లాస్టిక్‌కు బదులుగా పర్యావరణ అనుకూలమైన చెక్క సంబంధిత ప్రొడక్టులను ఎంచుకోవచ్చు. ఇప్పటికే కేంద్ర ప్రభుత్వం కూడా ప్లాస్టిక్ వాడకాన్ని తగ్గించాలని ఇండియన్ రైల్వేస్‌ను కోరినట్లు తెలుస్తోంది. దేశవ్యాప్తంగా సింగిల్ యూజ్ ప్లాస్టిక్ నిషేధం అమలులో ఉన్న నేపథ్యంలో రైల్వేస్ కూడా ఇందుకు అనుగుణంగా చర్యలు తీసుకోనుంది.

కేంద్రం నిషేధం విధించిన ప్లాస్టిక్ ప్రొడక్టులు జాబితా ఇలావుంది.

* ప్లాస్టిక్ స్టిక్స్‌తో కూడిన ఇయర్ బడ్స్

* బెలూన్స్‌కు ప్లాస్టిక్ స్టిక్స్

* ప్లాస్టిక్ ఫ్లాగ్స్

* ప్లాస్టిక్‌తో చేసిన క్యాండీ స్టిక్స్

* ప్లా్స్టిక్స్‌తో తయారు చేసిన ప్లేట్స్, కప్స్, గ్లాసులు, ఫోర్క్స్, స్పూన్స్, కత్తి, స్ట్రా, ట్రేస్, స్టిర్రర్స్

* స్వీట్ బాక్స్‌, ఇన్విటేషన్ కార్డ్, సిగరెట్ ప్యాకెట్స్ చుట్టూ ప్యాకేజింగ్ ఫిల్మ్స్

* 75 మైక్రాన్ కన్నా తక్కువ మందంలోని ప్లాస్టిక్ క్యారీ బ్యాగ్స్

ఇదిలవుంటే  ఇండియన్ రైల్వేస్ 2019లోనే ప్లాస్టిక్ వ్యర్థాలను తగ్గించుకోవడానికి అవసరమైన చర్యలు తీసుకుంటూ వస్తోంది. అయితే ఇప్పుడు సింగిల్ యూజ్ ప్లాస్టిక్ నిషేధం నేపథ్యంలో రైల్వే వెండర్లు అందరూ ప్లాస్టిక్ ఉపయోగించకూడదు. కార్బన్ ఉద్ఘారాలను తగ్గించుకోవడానికి ప్లాస్టిక్ బ్యాగ్స్ బదులుగా రీయూజబుల్ బ్యాగ్స్‌ను ఉపయోగించాల్సి ఉంటుంది. కాగా మరోవైపు ట్రైన్స్‌లో విక్రయించే ఫుడ్ ఐటమ్స్‌పై 5 శాతం జీఎస్‌టీ పడుతుంది. అలాగే ప్లాట్‌ఫామ్‌పై విక్రయించే వాటిపై కూడా ఇదే రకమైన జీఎస్‌టీ ఉంటుంది. అథారిటీ ఆఫ్ అడ్వాన్స్ రూలింగ్స్ (ఏఏఆర్) తాజాగా ఈ విషయాన్ని వెల్లడించింది. అయితే న్యూస్ పేపర్లు మాత్రం ఇందుకు మినహాయింపు అని స్పష్టం చేసింది.