అల్-జవహిరీ వారసుడి అన్వేషణ..రేసులో వారి పేర్లు

అల్-ఖైదా ఉగ్రవాద సంస్థ అధినేత అయామన్ అల్-జవహిరీని డ్రోన్‌ల సాయంతో అమెరికా అంతం చేసింది. దీంతో అల్-ఖైదా  తదుపరి చీఫ్ ఎవరు? అనే చర్చ జరుగుతోంది. ప్రపంచవ్యాప్తంగా వేలాది మంది అమాయకుల ప్రాణాలు తీసిన ఉగ్రవాద సంస్థ బాధ్యతలను అప్పగించేందుకు నలుగురు సీనియర్లు పేర్లు పరిశీలనలో ఉన్నట్లు తెలుస్తోంది. అయితే జవహిరీ వారసుని ఎంపిక ఏవిధంగా జరుగుతుందో ఇంకా తెలియడం లేదు. బిన్ లాడెన్‌‌ను 2011లో అమెరికా సైన్యం హతమార్చిన తర్వాత అల్-ఖైదా బాధ్యతలను జవహిరీ స్వీకరించాడు. తాజాగా, అతడ్ని కూడా సీఐఏ మట్టుబెట్టడంతో కొత్త వారసుడ్ని ఎన్నుకోనున్నారు.

ఈ నేపథ్యంలో అల్‌ఖైదా ఇన్ ది ఇస్లామిక్ మఘ్రెబ్ కు చెందిన సైఫ్ అల్-అదెల్ , అబ్దల్-రహమాన్ అల్-మఘ్రెబి , యాజిద్ మెబ్రాక్ , అల్ షబాబా ఉగ్ర సంస్థకు చెందిన అహ్మద్ దిరియే పేర్లు ప్రధానంగా వినిపిస్తున్నాయి. అల్-జవహిరికి వారసుని ఎంపిక కోసం వీరి పేర్లను పరిశీలించే అవకాశం ఉన్నట్లు తెలుస్తోంది.

అయితే, వీరిలో సైఫ్ అల్-అదెల్‌కు మొదటి ప్రాధాన్యత ఇవ్వనున్నట్టు మిడిల్ ఈస్ట్ ఇన్‌స్టిట్యూట్ పేర్కొంది. అమెరికా నిఘా వర్గాల ప్రకారం.. ఈజిప్టు ఆర్మీ మాజీ అధికారి అయిన అదెల్.. అల్-ఖైదా వ్యవస్ధాపక సభ్యుల్లో ఒకరు. 1980వ దశకంలో మక్తబ్ అల్-ఖదిమత్ అనే ఉగ్రవాద సంస్థలో చేరి.. తర్వాత లాడెన్, అల్-జవహిరీలను కలిశాడు. తర్వాత తన అనుచరులతో ఈజిప్టియన్ ఇస్లామిక్ జిహాద్‌లో చేరాడు. అంతేకాదు, 80వ దశకంలో అఫ్గనిస్థాన్‌లోని రష్యా సైన్యాలతో పోరాటం చేశాడు.

అల్-ఖైదా ఉగ్రవాద సంస్థను ఏర్పాటు చేసిన తర్వాత బిన్ లాడెన్‌కు సెక్యూరిటీ చీఫ్‌గా వ్యవహరించిన అదేల్‌ను 2001 నుంచి ఎఫ్‌బీఐ మోస్ట్ వాంటెడ్ ఉగ్రవాది జాబితాలో ఉంచింది. అతడి ఆచూకీ గురించి చెప్పినవారికి 10 మిలియన్ డాలర్ల నజరానా కూడా ప్రకటించింది. అమెరికా పౌరుల హత్యలు, ఆస్తులను ధ్వంసం చేయడానికి, ఆ దేశ జాతీయ రక్షణ సంస్థలను నాశనం చేయడానికి అదెల్ కుట్ర పన్నినట్లు ఎఫ్‌బీఐ పేర్కొంది.

ఇక, ఏబీసీ పాత నివేదికల ప్రకారం.. సైఫ్ అల్-అదెల్ కోసం అమెరికా దళాలు 1993 నుంచి గాలిస్తున్నాయి. సోమాలియాలోని మొగదిషులో జరిగిన బ్లాక్ హాక్ డౌన్ సంఘటనలో 18 మంది అమెరికన్లు ప్రాణాలు కోల్పోయారు. ఈ ఘటన వెనుక అదెల్ ఉన్నట్టు ఎఫ్‌బీఐ గుర్తించింది. అలాగే, లాడెన్ చనిపోయిన తర్వాత అల్-ఖైదాకు అత్యంత ముఖ్యమైన వ్యూహకర్తగా అదెల్ ఎదిగినట్టు అంతర్జాతీయ మీడియా కథనాలు పేర్కొంటున్నాయి.

అయితే, బ్లాక్ హాక్ డౌన్ ఘటన తర్వాత నుంచి అతను ఇరాన్‌లో ఉన్నందున అల్-ఖైదా చీఫ్‌గా నియమించడం సంక్లిష్టంగా ఉంటుందని మిడిల్ ఈస్ట్ ఇన్‌స్టిట్యూట్ తెలిపింది. ఇటీవలి సంవత్సరాలలో కనీసం మూడు అల్-ఖైదా అనుబంధ సంస్థలు సైఫ్ అల్-అదెల్ సూచనలతో పుట్టుకురావడంతో అతడి విశ్వసనీయతను ప్రశ్నించినట్లు కూడా ఇన్‌స్టిట్యూట్ పేర్కొంది.