అలా ఓటు వేస్తే రూ.25 కోట్లు ఇస్తామన్నారు: రాజస్థాన్ మంత్రి

రాజస్థాన్ మంత్రి ఇటీవల జరిగిన రాజ్యసభ సభ్యుల ఎన్నికలపై సంచలన వ్యాఖ్యలు చేశారు. ఇటీవల జరిగిన రాజ్యసభ ఎన్నికల్లో ఓ అభ్యర్థికి ఓటేస్తే రూ.25 కోట్లు ఇస్తామన్నారని మంత్రి రాజేంద్ర గుఢా  వ్యాఖ్యలు చేశారు. అంతేకాదు, 2020 జులైలో సీఎం అశోక్ గెహ్లాట్‌పై సచిన్ పైలట్ తిరుగుబాటు చేసిన సమయంలోనూ తమకు సహకరిస్తే రూ.60 కోట్లు ఇస్తామని ఓ నేత ఆఫర్ చేశాడని, అప్పుడూ దానిని తిరస్కరించానని వ్యాఖ్యానించారు. సోమవారం ఝున్‌ఝున్‌లోని ఓ ప్రయివేట్ స్కూల్‌లో జరిగిన కార్యక్రమానికి హాజరైన రాజస్థాన్ సైనిక సంక్షేమ శాఖ మంత్రి రాజేంద్ర గుఢా చేసిన వ్యాఖ్యలు ప్రస్తుతం సోషల్ మీడియాలో వైరల్ అవుతున్నాయి. 2018 ఎన్నికల్లో బీఎస్పీ నుంచి గెలిచి తర్వాత కాంగ్రెస్‌లో చేరిన ఆరుగురు ఎమ్మెల్యేల్లో రాజేంద్ర గుధా ఒకరు.

స్కూల్‌లో ఓ విద్యార్థి అడిగిన ప్రశ్నకు మంత్రి రాజేంద్ర గుఢా సమాధానం ఇస్తూ.. ‘‘రాజ్యసభ ఎన్నికల్లో ఓ వ్యక్తికి ఓటేస్తే రూ.25 కోట్లు ఇస్తామని ఆఫర్ చేశారు.. ఈ విషయం గురించి నా భార్యకు చెబితే నమ్మకం కంటే డబ్బు ముఖ్యం కాదని చెప్పింది’’ అన్నారు. అయితే, నేత పేరుగానీ, ఆయన ఏ పార్టీ వ్యక్తి అనేది మాత్రం ఆయన వెల్లడించలేదు. సచిన్ పైలట్ తిరుగుబాటుతో రాజస్థాన్‌లో ఏర్పడిన రాజకీయ సంక్షోభం సమయంలోనూ ఇటువంటి ఆఫరే వచ్చిందని తెలిపారు.

‘‘రాజకీయ సంక్షోభం ఏర్పడినప్పుడు నాకు రూ.60 కోట్ల ఆఫర్ ఉందని కూడా నేను మీకు చెప్పాలనుకుంటున్నాను.. నేను మా కుటుంబంతో మాట్లాడాను. నా భార్య, కొడుకు, కూతురు తమకు డబ్బు కాదు నమ్మకం కావాలి అన్నారు.. మనతో ఉన్నవారు అలా ఆలోచిస్తే అంతా సర్దుకుపోతుంది’’ అని వ్యాఖ్యానించారు. బీఎస్పీ నుంచి గెలిచి కాంగ్రెస్‌లో చేరిన తర్వాత సీఎం అశోక్ పట్ల రాజేంద్ర గుఢా విధేయతను చాటుకుని సంక్షోభం సమయంలో ఆయన వెంట నిలిచారు. దీంతో గతేడాది నవంబరులో జరిగిన క్యాబినెట్ విస్తరణలో రాజేంద్రకు మంత్రి పదవి లభించింది. ఆయన సైనిక సంక్షేమ శాఖ బాధ్యతలు నిర్వర్తిస్తున్నారు.

ఇదిలావుంటే తమ ప్రభుత్వాన్ని కూల్చడానికి బీజేపీ నిరంతరం ప్రయత్నాలు చేస్తోందని, ఎమ్మెల్యేలను కొనుగోలు చేయడానికి కోట్లు ఆఫర్ చేస్తోందని రాజస్థాన్ సీఎం అశోక్ గెహ్లాట్ పదే పదే ఆరోపణలు చేస్తున్నారు. ఇటీవల రాజస్థాన్‌లో నాలుగు రాజ్యసభ స్థానాలకు జరిగిన ఎన్నికల్లో మూడింటిని కాంగ్రెస్, ఒకటి బీజేపీ గెలుచుకున్నాయి. అయితే, అక్కడ నాలుగో స్థానంలో గెలుపు అవకాశాలు లేకపోవడంతో వ్యూహాత్మకంగా ఇండిపెండెంట్‌గా పోటీ చేసిన మీడియా మొఘల్ సుభాష్ చంద్రకు బీజేపీ మద్దతు ప్రకటించింది. కానీ, ఆయనకు ఓటమి తప్పలేదు.