ఆ బూతు వీడియో ఫోరెన్సిక్ ల్యాబ్ కు చేరిందా, లేదా: వర్ల రామయ్య
Andhra Pradesh Telugu | Suryaa Desk | Published : Sun, Aug 07, 2022, 09:18 PM
వైసీపీ ఎంపీ గోరంట్ల మాధవ్ నగ్న బూతు వీడియో ఫోరెన్సిక్ ల్యాబ్ కు చేరిందా, లేదా అంటూ వైసీపీ ప్రభుత్వాన్ని టీడీపీ నేత వర్ల రామయ్య నిలదీశారు. వైసీపీ ఎంపీ గోరంట్ల మాధవ్ నగ్న వీడియో కాలింగ్ వ్యవహారం తీవ్ర విమర్శలకు దారితీసింది. ఈ వీడియో నేపథ్యంలో వైసీపీ నాయకత్వంపై టీడీపీ నేతలు ప్రశ్నాస్త్రాలు సంధిస్తున్నారు. ఈ అంశంపై తాజాగా టీడీపీ పొలిట్ బ్యూరో సభ్యుడు వర్ల రామయ్య స్పందించారు. "ముఖ్యమంత్రి గారూ... ఎంపీ మాధవ్ బూతు పురాణం ఘటనలో ఆ బూతు వీడియోను ఫోరెన్సిక్ ల్యాబ్ కు పంపామని సజ్జల చెబుతున్నారు. అయితే ఆ వీడియోను ఏ ల్యాబ్ కు పంపారు? ఏ పోలీస్ స్టేషన్ నుంచి ఏ అధికారి పంపారు? ఏఏ సెక్షన్ లతో కేసు నమోదు చేశారు? అసలు ఆ బూతు వీడియో ఫోరెన్సిక్ ల్యాబ్ కు చేరిందా, లేదా? చేరితే... ఎప్పుడు చేరింది?" అంటూ వర్ల రామయ్య ప్రశ్నల వర్షం కురిపించారు.
అంతకుముందు, ఈ వీడియో ఉదంతంపై వైసీపీ రాష్ట్ర ప్రధాన కార్యదర్శి సజ్జల రామకృష్ణారెడ్డి స్పందిస్తూ, వీడియో నిజమని తేలితే ఎంపీ గోరంట్ల మాధవ్ పై కఠినాతికఠినమైన చర్యలు ఉంటాయని వెల్లడించారు. ఇతరులకు గుణపాఠంలా ఈ చర్యలు ఉంటాయని స్పష్టం చేశారు. అటు, గోరంట్ల మాధవ్ వ్యవహారంలో విచారణ జరిపి వాస్తవాలు వెలికితీయాలని ఏపీ మహిళా కమిషన్ చైర్ పర్సన్ వాసిరెడ్డి పద్మ రాష్ట్ర డీజీపీ రాజేంద్రనాథ్ రెడ్డికి లేఖ రాశారు.
|
|