ప్రభుత్వం నుంచి నో గ్రీన్ సిగ్నల్...వాయిదా పడ్డా కళ్యాణ మస్తు కార్యక్రమం

ప్రభుత్వం నుంచి అనుమతి రాకపోవడంతో ఈ నెల 7వ తేదీన జరగాల్సిన కళ్యాణమస్తూ కార్యక్రమం కాస్త వాయిదా పడింది. ఇదిలావుంటే పదకొండేళ్ల కిందట నిలిపివేసిన కళ్యాణమస్తు కార్యక్రమాన్ని పునఃప్రారంభించేందుకు తిరుమల తిరుపతి దేవస్థానం ఘనంగా ఏర్పాట్లు చేసింది. ఈ కార్యక్రమాన్ని ఆగస్టు 7న నిర్వహిస్తామని కొద్ది రోజుల కిందట ప్రకటించింది. అయితే, ఆదివారం జరగాల్సిన కళ్యాణమస్తు వాయిదా పడినట్లు తెలుస్తోంది. 2011లో కళ్యాణమస్తును టీటీడీ నిలిపివేసిన విషయం తెలిసిందే. ఈ కార్యక్రమం ద్వారా పేద హిందువులకు సంప్రదాయబద్ధంగా వివాహం వేడుక నిర్వహిస్తారు. అందులో భాగంగా ఆగస్టు 7 చాంద్రమాన శుభకృత్‌ నామ సంవత్సరం శ్రావణ శుక్లపక్ష దశమి ఆదివారం ఉదయం 8.07 నుంచి 8.17 గంటల మధ్య అనురాధ నక్షత్రం, సింహలగ్నంలో వివాహ వేడుకను జరిపించాలని వేద పండితులు ముహూర్తం నిర్ణయించారు.

అయితే, ప్రభుత్వం నుంచి దీనికి అనుమతులు రాకపోవడంతో వాయిదా పడినట్లు సమాచారం. టీటీడీ నోటిఫికేషన్ విడుదల చేయడంతో ఇప్పటికే చాలామంది సామూహిక వివాహాలకు జిల్లా కేంద్రాల్లో పేర్లు నమోదు చేసుకున్నారు. అయితే, కళ్యాణమస్తు వాయిదాపై టీటీడీ ఇప్పటివరకూ అధికారికంగా ఎలాంటి ప్రకటనా చేయలేదు. త్వరలోనే మరో ముహూర్తం నిర్ణయించి కళ్యాణమస్తును నిర్వహించేందుకు సిద్ధమైనట్లు తెలుస్తోంది.

2007లో కళ్యాణమస్తు కార్యక్రమాన్ని ప్రారంభించిన ప్రభుత్వం.. పేద హిందువులు వివాహం చేసుకునేందుకు అవకాశం కల్పించింది. కళ్యాణమస్తులో వివాహాలు చేసుకున్న జంటకు టీటీడీ తరఫున బంగారు తాళి బొట్టు, వధూవరులకు వస్త్రాలు, వారి బంధువులు 50 మందికి ఉచితంగా భోజన ఏర్పాట్లు చేసేవారు. 2011 వరకు ఏటా రెండు విడతల్లో ఈ కార్యక్రమం నిర్వహించారు. ఆ తర్వాత ఆర్థిక భారం, సిబ్బంది అవినీతికి పాల్పడుతున్నారనే కారణాలతో నిలిపివేశారు.