అల్లు అర్జున్ తొలి రెమ్యునరేషన్ ఎంతంటే ?

స్టైలిష్ స్టార్ అల్లు అర్జున్ ఇప్పుడు ఒక్కో సినిమాకు 10 కోట్లకు పైగానే రెమ్యునరేషన్ తీసుకుంటున్నాడు. ఈయన సినిమాలకు దాదాపు 80 కోట్లకు పైగా మార్కెట్ కూడా ఉంది. అయితే ఈయన ఒకప్పుడు ఎలా మొదలయ్యాడో తెలుసా.. ఈయన తన కెరీర్‌లో తీసుకున్న తొలి పారితోషికం ఎంతో తెలుసా.. తెలిస్తే నిజంగానే షాక్ అవుతారు. ఎందుకంటే కనీసం మాటల్లో కూడా చెప్పడానికి వీల్లేనంత తక్కువ రెమ్యునరేషన్ తీసుకున్నాడు బన్నీ. ఆయనకు తొలి పారితోషికం ఇచ్చింది కూడా ఎవరో కాదు.. దర్శకేంద్రుడు రాఘవేంద్రరావు. ఆయన చేతుల మీదుగానే బన్నీ ఇండస్ట్రీకి పరిచయం అయ్యాడు.రాఘవేంద్రుడి 100వ సినిమా.. బన్నీకి మొదటి సినిమా.. అదే గంగోత్రి. 2003లో విడుదలైన ఈ చిత్రం మంచి విజయం సాధించింది. బన్నీ కెరీర్‌కు బాటలు వేసింది. ఈ చిత్రం తర్వాత ఇప్పటి వరకు మళ్లీ ఆయనతో సినిమా చేయలేదు అల్లు వారబ్బాయి. అయితే ఈ మధ్యే అలీ షోకు వచ్చిన రాఘవేంద్రరావు కొన్ని ఆసక్తికరమైన నిజాలు బయటపెట్టాడు. బన్నీకి తానే తొలి రెమ్యునరేషన్ ఇచ్చానని చెప్పాడు ఈయన. అప్పట్లో అల్లు అర్జున్ డాన్స్ చూసి వాళ్ల అమ్మకు 100 రూపాయలు ఇచ్చాడు రాఘవేంద్రుడు. ఎప్పటికైనా మీ వాన్ని నేనే పరిచయం చేస్తానంటూ అప్పుడే మాట తీసుకున్నాడు దర్శకేంద్రుడు. అన్నట్లుగానే అశ్వినీదత్, అల్లు అరవింద్ నిర్మాణంలో గంగోత్రి సినిమా చేసాడు ఈయన. ఈ సినిమాతో బన్నీ అద్భుతమైన కెరీర్‌కు బాటలు పడ్డాయి.. ఆ వెంటనే ఆర్య, బన్నీ సినిమాలతో హ్యాట్రిక్ కూడా అందుకున్నాడు అల్లు అర్జున్. ఇప్పుడు తెలుగు ఇండస్ట్రీలో లీడింగ్ హీరోగా నిలిచాడు. ఈ 16 ఏళ్ల కెరీర్‌లో ఎన్నో అద్భుతమైన రికార్డులు సృష్టించాడు బన్నీ. తనను తాను కూడా చాలా మార్చుకున్నాడు.