తమిళనాడు వాసులకు డీఎంకే ప్రభుత్వం భారీ శుభవార్త .. రూ.3 వేలు, ధోతి, చీర, నిత్యావసరాలు కూడా

వచ్చే ఏడాది తమిళనాడు అసెంబ్లీ ఎన్నికలు జరగనుండగా.. ఓటర్లను ప్రసన్నం చేసుకునేందుకు అన్ని పార్టీలు వ్యూహాత్మక అడుగులు వేస్తున్నాయి. ఇందులో భాగంగానే అధికార ద్రవిడ మున్నేట్ర కజగం (డీఎంకే) ముందడుగు వేసింది. పొంగల్ సందర్భంగా.. తమిళనాడులోని రేషన్ కార్డుదారులకు బిగ్ గుడ్‌న్యూస్ చెప్పింది. ఏటా తమిళనాడులో పొంగల్ సందర్భంగా.. నగదు, నిత్యావసరాలు అందిస్తుండగా.. ఈసారి మరింత కొత్తగా ఉండనున్నట్లు ప్రకటించింది. ఎన్నికల వేళ వస్తున్న సంక్రాంతి కావడంతో.. ఎంకే స్టాలిన్ నేతృత్వంలోని ప్రభుత్వం.. ప్రజలను తమవైపు తిప్పుకునే ప్రయత్నాలు చేస్తోంది.

తమిళనాడు పొంగల్ గిఫ్ట్ పథకం 2026కు సంబంధించి ఆ రాష్ట్ర ప్రభుత్వం కీలక ప్రకటన చేసింది. ఈ పథకంలో భాగంగా రేషన్ కార్డు ఉండి అర్హులైన ప్రతి ఒక్క కుటుంబానికి రూ.3 వేల నగదు సాయం చేయనున్నట్లు తెలిపింది. అంతేకాకుండా స్పెషల్‌గా పొంగల్ గిఫ్ట్ హ్యాంపర్‌ను అందించనున్నారు. ఈ నిత్యావసరాలు, డబ్బుల పంపిణీ కార్యక్రమాన్ని తమిళనాడు సీఎం ఎంకే స్టాలిన్.. జనవరి రెండవ వారం ప్రారంభించనున్నట్లు ప్రభుత్వ వర్గాలు తెలిపాయి.

అయితే ఈ పంపిణీ ప్రక్రియ మరింత సులభతరం చేయడంలో భాగంగా జనవరి తొలి వారంలోనే టోకెన్లను రేషన్ షాపు సిబ్బంది ఇంటింటికీ తిరిగి పంపిణీ చేయనున్నారు. ఆ టోకెన్‌పై పేర్కొన్న తేదీ, సమయం ఆధారంగా లబ్ధిదారులు.. వారికి కేటాయించిన రేషన్ షాప్‌లకు వెళ్లి నగదుతోపాటు.. బహుమతులను కూడా పొందవచ్చని తమిళనాడు ప్రభుత్వ వర్గాలు తెలిపాయి.

తమిళనాడు పొంగల్ గిఫ్ట్ 2026 లో నగదుతోపాటు నిత్యావసర వస్తువులు ఉండనున్నాయి. ఒక కిలో బియ్యం, కిలో చక్కెర, ఒక పొడవాటి చెరుకు గడ, ధోతీ, చీర, జీడిపప్పు, ఎండు ద్రాక్ష, యాలకులను అందించనున్నారు. అయితే గతేడాది కేవలం గిఫ్ట్ హ్యాంపర్‌ మాత్రమే ప్రభుత్వం అందించగా.. ప్రస్తుత ఏడాదిలో అసెంబ్లీ ఎన్నికలు ఉండటంతో.. ఈ పథకంలో భాగంగా ఈసారి రూ.3 వేల నగదు సహాయం అందించనున్నారు. ఇలా పొంగల్ గిఫ్ట్ కారణంగా ప్రజలకు పండుగ ఖర్చుల నుంచి ఊరట కలిగించనుంది.