తండ్రి వద్దే శిక్షణ,,, సిడ్నీ ఉగ్రదాడి కేసులో విస్తుపోయే విషయాలు

ఆస్ట్రేలియాలోని ప్రసిద్ధ బాండీ బీచ్‌ను రక్తసిక్తం చేసిన ఉగ్రదాడి వెనుక ఉన్న భీకర కుట్రను పోలీసులు ఛేదించారు. ఈ ఘోరానికి ఒడిగట్టిన తండ్రీకొడుకులు సాజిద్‌ అక్రమ్‌ (50), నవీద్‌ అక్రమ్‌ (24) పక్కా వ్యూహంతోనే ఈ మారణహోమానికి పాల్పడినట్లు దర్యాప్తులో తేలింది. ఈ కేసుకు సంబంధించి కోర్టులో సమర్పించిన కీలక పత్రాల్లో నిందితులు పొందిన యుద్ధ శిక్షణ, విదేశీ పర్యటనల గురించిన విస్తుపోయే విషయాలు వెల్లడి అయ్యాయి. ముఖ్యంగా నిందితులు కాల్పులకు ముందు భారీ కసరత్తు చేసినట్లు పోలీసులు గుర్తించారు.

న్యూ సౌత్ వేల్స్‌లోని మారుమూల గ్రామీణ ప్రాంతాల్లో వీరు తుపాకులు పట్టుకుని ఫైరింగ్ ప్రాక్టీస్ చేస్తున్న వీడియోలను అధికారులు స్వాధీనం చేసుకున్నారు. ఈ ఏడాది అక్టోబరులో రికార్డైన ఈ వీడియోల్లో.. శత్రువుల కంట పడకుండా ఎలా దాక్కోవాలి, కాల్పులు జరిపి ఎలా పారిపోవాలి అనే అంశాలపై వీరు 'టాక్టికల్ ట్రైనింగ్' తీసుకున్నట్లు స్పష్టం అవుతోంది. నిందితుల పర్యటనలు అంతర్జాతీయ ఉగ్రవాద సంస్థలతో సంబంధాలు ఉన్నట్లు చెబుతున్నాయి. ముఖ్యంగానవంబరులో తండ్రీకొడుకులు ఇద్దరూ ఫిలిప్పీన్స్‌లోని దవావో నగరానికి వెళ్లి అక్కడ ఒక హోటల్‌లో నెల రోజులు బస చేశారు. దవావో నగరం ఇస్లామిక్ స్టేట్ (ISIS) కార్యకలాపాలకు కేంద్రంగా ఉన్న నేపథ్యంలో.. వీరు అక్కడే ఉగ్రదాడికి అవసరమైన తుది శిక్షణ పొంది ఉండవచ్చని నిఘా వర్గాలు అనుమానిస్తున్నాయి.

తప్పిన పెను ప్రమాదం.. బాంబులు పేలి ఉంటే?

డిసెంబరు 12వ తేదీన బాండీ బీచ్‌ వద్ద రెక్కీ నిర్వహించిన నిందితులు.. డిసెంబరు 14వ తేదీన యూదుల హనుక్కా ఉత్సవం లక్ష్యంగా దాడికి తెగబడ్డారు. కాల్పులు జరపడానికి ముందు వీరు జనంపైకి నాలుగు బాంబులను విసిరారు. అయితే అదృష్టవశాత్తూ ఆ బాంబులేవీ పేలకపోవడంతో ప్రాణనష్టం 15 మందితో ఆగిపోయింది. లేదంటే ఆ ప్రాంతం శవాల దిబ్బగా మారేదని పోలీసులు తెలిపారు. నిందితుల వాహనంలో కూడా ఒక సజీవ బాంబును అధికారులు స్వాధీనం చేసుకున్నారు.

ఈ దాడిలో పోలీసుల కాల్పుల్లో సాజిద్ అక్రమ్ హతమవ్వగా.. కొడుకు నవీద్‌ను పోలీసులు అరెస్ట్ చేశారు. కాగా సాజిద్ అక్రమ్‌ది భారత దేశంలోని హైదరాబాద్ అని తేలడం గమనార్హం. ఇదిలా ఉండగా.. సాజిద్ భార్య వెనెరా గ్రోసో తన భర్త మృతదేహాన్ని స్వీకరించడానికి నిరాకరించారు. "అతడితో నాకు ఎలాంటి సంబంధం లేదు" అని ఆమె తెగేసి చెప్పడం సంచలనంగా మారింది. ప్రస్తుతం ఈ ఉగ్ర కుట్రలో ఇంకా ఎవరికైనా సంబంధం ఉందా అనే కోణంలో ఆస్ట్రేలియా పోలీసులు గాలిస్తున్నారు.