దర్శకనిర్మాతగా హీరో శ్రీనివాసరెడ్డి

ఫ్లయింగ కలర్స్ ఎంటర్‌టైన్‌మెంట్ ప్రొడక్షన్స్ బ్యానర్‌పై శ్రీనివాసరెడ్డి, సత్య, షకలక శంకర్ ప్రధాన పాత్రధారులుగా రూపొందుతోన్న చిత్రం ‘భాగ్యనగర వీధుల్లో’. ఈ చిత్రం ద్వారా కమేడియన్ వై.శ్రీనివాస రెడ్డి దర్శకనిర్మాతగా మారుతున్నారు. ఈ చిత్రం ఈనెల 6న విడుదల కానుంది. ఈ సందర్భంగా శ్రీనివాస రెడ్డి మాట్ల‌డుతూ ..
రెండింటికీ చాలా తేడా…
సినిమాల్లో నటించేటప్పుడే డైరెక్షన్‌లో అక్కడక్కడా మెళకువలు నేర్చుకుంటూనే ఉన్నాను. నా డైరెక్టర్స్ ఎలా చేస్తున్నారో గమనించి డైరెక్షన్ నేర్చుకున్నాను. ఫిల్మ్ మేకింగ్ గురించి తెలియడానికి, సినిమాను తెరకెక్కించడానికి చాలా తేడా ఉంటుంది. ఈ సినిమా చేయడం వల్ల చాలా నేర్చుకున్నాను.
విలువైన సలహా ఇచ్చారు…
సినిమా చూసిన నిర్మాత దిల్ రాజు ఒక విలువైన సలహా ఇచ్చారు. అది చాలా పనికొచ్చింది. సినిమా సెట్స్ పైకి రాకముందు చాలా మంది అభిప్రాయాలను తీసుకున్నాను. అనిల్ రావిపూడి లాంటి దర్శకులకు కూడా ఈ సినిమా చూపించాను. ‘సినిమా బావుంది… జాగ్రత్తగా చేసుకో’అని అన్నారు.
కడుపుబ్బా నవ్విస్తాయి…
సినిమాలో రసగుల్లా ఎపిసోడ్ హైలెట్ అవుతుంది. ‘బతుకు ఎడ్లబండి’ అంటూ వచ్చే ఎపిసోడ్‌తో పాటు, ఆ మధ్య సోషల్ మీడియాలో వైరల్ అయిన ఎలిమెంట్స్‌ని సందర్భానుసారంగా చూపించాం. అవన్నీ వరుసగా ప్రేక్షకులను కడుపుబ్బా నవ్విస్తాయి.
అప్పుడే నా స్థాయి తెలుస్తుంది…
నటుడిగా నేనేంటో నాకు తెలుసు. ఇక దర్శకుడిగా నా స్థాయి ఏంటనేది ఈ సినిమా విడుదలైతేనే తెలుస్తుంది. దర్శకుడిగా సక్సెస్ అయి నిర్మాతగా డబ్బులు వస్తే.. దర్శక నిర్మాతగా కూడా కొనసాగుతాను.
సొంతంగా విడుదల చేస్తున్నా…
సినిమా సిద్ధమయ్యాక సక్సెస్ గ్యారంటీ అని ఇంకా నమ్మకం కుదిరింది కాబట్టే సొంతంగా ఈ చిత్రాన్ని విడుదల చేస్తున్నా. అన్ని వర్గాల ప్రేక్షకులకు ఈ చిత్రం నచ్చుతుందని ఆశిస్తున్నాను.