రిలీజ్‌కు ముందే 150 టికెట్లు కొన్న వీరాభిమాని!

సినిమా రిలీజ్‌కు ముందే ఓ ఫ్యాన్ ఒకటి కాదు రెండు ఏకంగా 150 టికెట్లు కొనేశాడు. ప్రభుదేవా డైరెక్ట్ చేసిన ‘దబాంగ్ 3’ సినిమా క్రిస్మస్‌కు ప్రేక్షకుల ముందుకు రానుంది. ఈ చిత్రం తెలుగులోనూ విడుదల కాబోతోంది. సోనాక్షి సిన్హా, సయీ మంజ్రేకర్ కథానాయికలుగా నటించారు. జమ్ము కశ్మీర్‌కు చెందిన రోహిత్ అనే యువకుడు సల్మాన్ ఖాన్‌కు వీరాభిమాని. సల్మాన్ అంటే అతనికి ఎంత పిచ్చి అంటే... ఆయన నుంచి ఏ సినిమా వచ్చినా ఫస్ట్ డే ఫస్ట్ షో కోసం ఏకంగా 100 టికెట్లు కొనేస్తుంటాడు. ఈసారి ‘దబాంగ్ 3’ సినిమా కోసం కూడా అన్ని టికెట్లు కొనేశాడు. ఇతనే కాదు.. విజయ్ అనే మరో అభిమాని నీకంటే నేనేం తక్కువ అనుకుని ఏకంగా 150 టికెట్లు కొనేశాడు. అది కూడా ముంబయిలోని గైటీ గెలాక్సీలో సినిమా చూడాలని అతను ముందుగానే కాస్త డబ్బు ఎక్కువైనా టికెట్లు కొనేసుకున్నాడు. సల్మాన్ ఖాన్ నటించిన ‘దబాంగ్’ సిరీస్ నుంచి రాబోతున్న మూడో సినిమా ఇది. మొదటి రెండు సినిమాలకు మంచి హైప్ వచ్చింది. సినిమాలు హిట్ అయ్యాయి కూడా. కానీ ‘దబాంగ్ 3’కి మాత్రం అంత సందడి కనిపించడంలేదు. పైగా ఈ సినిమాను సేమ్ టైటిల్‌తో తెలుగు, తమిళంలోనూ రిలీజ్ చేస్తున్నారు. తమిళనాడులో సినిమాను ప్రమోట్ చేసుకోవడానికి సల్మాన్ చెన్నై కూడా వెళ్లారు. చెన్నైలో సినిమా ప్రమోషన్స్ కోసం వెళ్లిన సల్మాన్ ఆసక్తికరమైన వ్యాఖ్యలు చేశారు. ప్రభాస్ నటించిన ‘బాహుబలి’, ‘సాహో’ సినిమాను హిందీ ప్రేక్షకులు ఆదరించారు కాబట్టి, తన సినిమాను తమిళ, తెలుగు ప్రేక్షకులు ఆదరించాలని కోరారు. అంతేకాదు తనకు రజనీకాంత్ అంటే చాలా ఇష్టమని తెలిపారు. చెన్నైతో తనకు ప్రత్యేకమైన అనుబంధం ఉందని, తన కెరీర్‌లో చేసిన తొలి ప్రకటనను చెన్నైలోనే షూట్ చేశామని తెలిపారు.