ఇలాంటి పాత్రలో నటించ డం నాకు తొలిసారి : పాయల్‌

డిస్కోరాజాతో మాస్‌ హీరో రవితేజతో కలిసి తెరపైకి వచ్చింది ఢిల్లి భామ పాయల్‌ రాజ్‌పుత్‌. ఈ చిత్రంలో హెలెన్‌ పాత్రలో 80ల నాటి అందాన్ని చూపించిందీ సుందరి. డిస్కోరాజాకు వస్తున్న ఆదరణ, తన కొత్త సినిమాల విశేషాలను పాయల్‌ తెలిపింది. ఆమె మాట్లాడుతూ…ఈ చిత్రంలో మూగ అమ్మాయిగా నటించాను. ఇలాంటి పాత్రలో నటించ డం నాకు తొలిసారి. సవాలులా అనిపించింది. నా పాత్ర నిడివి చాలా తక్కువని తెలుసు. అయితే కొత్త తరహా పాత్రను పోషించే అవకాశం దక్కుతుందని అంగీకరించాను.

సినిమా విడుదలయ్యాక వస్తున్న ప్రశంసలు సంతోషాన్నిస్తున్నాయి. మాటలతో మనమేదైనా చెప్పగలం కానీ మాట్లాడకుండా వివరించలేం. కేవలం సంజ్ఞలు చేయడమే ఆధారం. దర్శకుడు, రవితేజ చాలా సహాయపడ్డారు. ఒక శిక్షకుడిని కూడా నియమించారు. ఆయన నాకు ఎలా సైగలు చేయాలో నేర్పించారు. డిస్కోరాజా విడుదలయ్యాక నాకు సోషల్‌ మీడియా ద్వారా చాలా సందేశాలు వచ్చాయి. మీ క్యారెక్టర్‌ బాగుందంటూ చెప్పారు. నటిగా నాకిది నాలుగో సినిమా. చెన్నైలో తమిళ చిత్ర షూటిం గ్‌లో ఉండగా… దర్శకుడు వీఐ ఆనంద్‌ ఈ కథ చెప్పారు. కథ చెప్పగానే తప్పకుండా నటించాలని అనిపించింది. మంచి కథను ఎప్పుడూ వదులుకోను. రకరకాల తరహాల పాత్రలు పోషించాలని ఉంది. ఉదయనిధి స్టాలిన్‌తో కలిసి ఓ తమిళ చిత్రంలో నటిస్తున్నా. ప్రస్తుతం ఆ సినిమా విడుదలకు రాబోతోంది. ఈ చిత్రంలో 80ల నాటి అమ్మాయిగా కనిపించాను. అప్పటి మోడల్‌ దుస్తులు వేసుకోవడం బాగుంది. మేము కొందరు హిందీ నాయికల రిఫరెన్స్‌ తీసుకుని, అలా మేకోవర్‌ చేశాం. తలపై రిబ్బన్‌ పెట్టడంతో హెలెన్‌ పాత్ర లుక్‌లోకి మారిపోయాను. మాస్‌కు నచ్చేలా సినిమాలు చేయడం నాకిష్టమే. ఆర్‌ఎక్స్‌ 100 సినిమా నన్ను మాస్‌కు దగ్గర చేసింది. వెంకీమామతో కుటుంబ ప్రేక్షకులకు చేరువయ్యాను. ఆర్‌డీఎక్స్‌ సినిమా ఆడకున్నా, నాకు నటిగా సంతృప్తినిచ్చింది. ప్రస్తుతం ఐపీఎస్‌ ఆఫీసర్‌ పాత్రలో ఓ చిత్రంలో నటిస్తున్నాను.చిత్రీకరణ పూర్తయింది. ఇకపై కొంత విరామం తీసుకుని, మంచి కథలు ఎంపిక చేసుకోవాలని అనుకుంటున్నా. అని చెప్పింది.