కొంటె భర్త..చిలిపి భార్య

నటిగా, నిర్మాతగా ట్వింకిల్‌ ఖన్నా సుపరిచితం. అయితే ఆమెలోని  ప్రతిభావంతమైన  రచయిత్రిని  కొంతకాలంగా  పాఠకులు  చూస్తున్నారు. మిసెస్‌ ఫ్యానీబోన్స్‌, ద లెజెండ్‌ ఆఫ్‌ లక్ష్మీ ప్రసాద్‌ లాంటి  రచనలు పుస్తక ప్రియులను ఆకట్టుకున్నాయి. ఇటీవలే పైజామాస్‌ ఆర్‌ ఫర్‌గివింగ్‌ అనే మరో పుస్తకాన్ని రచించారు. ఈ పుస్తక ఆవిష్కరణకు భర్త అక్షయ్‌ కుమార్‌తో పాటు బాలీవుడ్‌ ప్రముఖులంతా తరలివచ్చారు. ఈ కార్యక్రమంలో భార్య ట్వింకిల్‌ ప్రతిభను ప్రశంసించారు అక్షయ్‌. సందేశాత్మక సినిమాలే కాదు తన జీవన విధానంలోనూ మంచిని ఆచరించి చూపిస్తారు అక్షయ్‌. ఆయన తాజాగా వాట్‌ ఈజ్‌ ఇన్‌ యువర్‌ డబ్బా అంటూ ఒక సవాలు విసిరారు. సతీమణి ట్వింకిల్‌ ఖన్నా సహా అనేక మంది సహ నటీనటులను సవాలు చేశారు. ఆయన ఈ సందర్భంగా స్పందిస్తూ…మంచి ఆహారం తీసుకోవడం నా జీవితంలో ఒక ముఖ్య భాగం. నేను నా ఆహారంలో అవకాడో ను తీసుకుంటా. హిమాయలన్‌ సాల్ట్‌ కొద్దిగా అవకాడోకు చేర్చుతాను. దీంతో పాటు బార్లీ బ్రెడ్‌, దానిమ్మ గింజలు, వాల్‌ నట్‌ పాలు, తేనే, దాల్చిన చెక్క పొడి, బెర్రీ పండ్లు తీసుకుంటాను. అని చెప్పారు. భర్త సవాలుకు స్పందించిన ట్వింకిల్‌ ఖన్నా మాట్లాడుతూ..నేను వడా పావ్‌ ఎక్కువగా తింటాను. అయితే ఆరోగ్య కరమైన ఆహారాన్ని తీసుకోవడం మర్చిపోను. బీట్‌ రూట్‌ టిక్కీస్‌ ఎక్కువగా తింటుంటా. అని చెప్పింది. ఈ బీట్‌ రూట్‌ టిక్కీలు ఎలా తయారు చేయాలో పోస్టులో పేర్కొంది. ఎక్కడ ఉన్నా, తన చుట్టున్న వాళ్లను నవ్విస్తుం టాడు అక్షయ్‌ కుమార్‌. అతనితో కలిసి నటిస్తున్నప్పుడు సెట్స్‌లో చాలా సరదాగా ఉంటారని, నవ్విస్తారని చెబుతుం టారు సహ నటీనటులు. తానో స్టార్‌ అనే తరహా అక్షయ్‌లో ఉండదని, అందరితో కలిసిపోతారని అంటారు. బయటి వాళ్లతో ఇంత సరదాగా ఉండే అక్షయ్‌, భార్య ట్వింకిల్‌ ఖన్నాతో ఇంకెంత తుంటరి పనులు చేస్తుంటారో ఊహించుకోవచ్చు. ఉల్లిగడ్డల ధరలు పెరగడంపై ఇటీవల సామాజిక మాధ్యమాల్లో వ్యంగ్యాలు, చతురోక్తులు పెరిగాయి. అప్పటిదాకా బంగారం అని పిలిచిన తన ప్రేయసిని ప్రియుడు ఉల్లిగడ్డ అని పిలవడం ప్రారంభిస్తాడట, ఇంట్లో దొంగలు పడి ఉల్లిని ఎత్తుకెళ్తారు…ఇలాంటి వినోదాత్మక పోస్టులు ఉల్లిగడ్డల ధరల చుట్టూ చక్కర్లు కొడుతున్నాయి. తన కొత్త సినిమాల ప్రచార కార్యక్రమాలకు వెళ్లిన అక్షయ్‌ కుమార్‌…అక్కడ వాళ్లు ఇచ్చిన ఉల్లిపాయ బుట్టాలను తెచ్చి తన భార్య ట్వింకిల్‌ ఖన్నాకు ఇచ్చాడు. ఆమె ఈ జుమ్కీలను తన సామాజిక మాధ్యమ ఖాతాలో పోస్టు చేసింది. ట్వింకిల్‌ స్పందిస్తూ…అక్షయ్‌ కపిల్‌ షో కు వెళ్లి వస్తూ నాకీ జుమ్కీలు తెచ్చాడు. ఆ కార్యక్రమ నిర్వాహకులు కరీనాకు ఉల్లిపాయ బుట్టాలు ఇచ్చారట. అవి ఆమెకు అంతగా నచ్చలేదు. నేను వీటిని బాగా ఇష్టపడతావని తెచ్చాడు. కొన్ని సార్లు చిన్న చిన్న పనులు, కొంటెవైనా మనసుకు హత్తుకుంటాయి. అంది. ఇలా అక్షయ్‌ కొంటె పనులకు, ట్వింకిల్‌ ఖన్నా చిలిపి సరదాలను పరిశ్రమ వాసులతో పాటు ప్రేక్షకులంతా ఈ దంపతుల విషయంలో చూసి ఆనందిస్తారు. వీళ్లు కలిసి దిగిన అనేక సరదా సెల్ఫీలు సోషల్‌ మీడియాలో చక్కర్లు కొడుతుంటాయి.