పాత్రలు నేర్పిన పాఠాలు
cinema | Suryaa Desk | Published : Thu, Jan 30, 2020, 04:47 PM
నటించిన ఒక్కో పాత్ర ఒక్కో పాఠాన్ని నేర్పించింది అంటోంది బాలీవుడ్ అందాల భామ ఆలియా భట్. ప్రేమ, కుటుంబ బంధాలు, వివాహ గొప్పదనం ఇలాంటి విషయాలన్నీ తను పోషించిన పాత్రలు తెలిపాయంటోందీ సుందరి. ఒక గొప్ప పాత్రను పోషిస్తున్నప్పుడు నటీనటులు దాని ప్రభావానికి తప్పక లోనవుతుంటారు. స్టార్లు అయినా మనుషులే కాబట్టి తీవ్రమైన భావోద్వేగాలున్న కొన్ని పాత్రలు వీళ్లను ఆవహిస్తుంటారు. ఆ పాత్రల ప్రభావంతో జీవితంలో కొన్ని కొత్త విషయాలు నేర్చుకుంటుంటారు. అలా తను చేసిన సినిమాల్లోనుంచి ఏం నేర్చుకుందో బాలీవుడ్ సుందరి ఆలియా భట్ చెబుతోంది. బాలీవుడ్లో పిన్న వయసులో నాయికగా తెరపైకి వచ్చింది ఆలియా. తొలి చిత్రం ‘స్టూడెంట్ ఆఫ్ ద ఇయర్’ లో నటించేప్పటికి ఆమె వయసు పదహారేళ్లు. తొలి సినిమాతో స్టైల్ ఐకాన్ అంటూ మంచి గుర్తింపు దక్కింది. తర్వాత ఒక్కో చిత్రంతో స్టార్గా ఎదిగింది. ఈ క్రమంలో గొప్ప వ్యక్తిత్వం పెంచుకునేందుకు తన పాత్రల ప్రభావాన్ని ఆలియా ఇలా వివరించింది. ‘స్టూడెంట్ ఆఫ్ ద ఇయర్’ సినిమాతో యువత మనోభావాల గమనం తెలిస్తే…’కపూర్ అండ్ సన్స్ చిత్రంతో కుటుంబాన్ని ప్రేమించడం, వాళ్లతో సమయం గడపడం ఎంత ముఖ్యమో నేర్చుకున్నాను. వివాహ బంధాలు, ప్రేమలో విడిపోవడాలు సర్వసాధారణమైన ఈ ప్రపంచంలో ప్రేమ విలువను ‘బద్రీనాథ్ కి దుల్హనియా’ సినిమాతో తెలుసుకున్నా.’ అని చెప్పుకుంది.
|
|