1971 నాటి 'ధర్మయుద్ధం' భారత్‌కు గర్వకారణం.. లెఫ్టినెంట్ జనరల్ మనోజ్ కుమార్ కటియార్

1971లో బంగ్లాదేశ్ విముక్తి సమయంలో భారత సైన్యం ప్రదర్శించిన శౌర్యం కేవలం భూభాగం కోసమో, అధికారం కోసమో కాదని.. అది అన్యాయానికి వ్యతిరేకంగా చేసిన 'ధర్మయుద్ధం' అని ఇండియన్ ఆర్మీ లెఫ్టినెంట్ జనరల్ మనోజ్ కుమార్ కటియార్ అభివర్ణించారు. ఆనాడు పాకిస్థాన్ సైన్యం సామాన్య ప్రజలపై చేసిన అరాచకాలు, హింసను చూస్తూ భారత్ మౌనంగా ఉండలేకపోయిందని ఆయన గుర్తుచేశారు. పొరుగు దేశంలో జరుగుతున్న మానవహక్కుల ఉల్లంఘనను అరికట్టి, బాధితులకు అండగా నిలవడమే లక్ష్యంగా భారత సైన్యం పోరాడి అద్భుత విజయాన్ని అందుకుందని ఆయన కొనియాడారు.
యుద్ధ సమయంలో కూడా భారత సైన్యం మానవీయ విలువలను విస్మరించలేదని, శత్రువులకు కూడా తగిన గౌరవం ఇచ్చిందని జనరల్ కటియార్ స్పష్టం చేశారు. పాకిస్థాన్ ఎప్పుడూ అధర్మాన్నే నమ్ముకుని కుట్రలు పన్నుతుందని, కానీ భారత్ మాత్రం యుద్ధ నీతిని పాటిస్తూ నైతిక విజయాన్ని సాధించిందని ఆయన పేర్కొన్నారు. లొంగిపోయిన వేలాది మంది పాక్ సైనికులను జెనీవా ఒప్పందం ప్రకారం గౌరవంగా చూసిన చరిత్ర మనదని, ప్రపంచ యుద్ధ చరిత్రలో ఇదొక అరుదైన మరియు గొప్ప ఉదాహరణ అని ఆయన ఈ సందర్భంగా వ్యాఖ్యానించారు.
చరిత్ర నుంచి సరైన పాఠాలు నేర్చుకోకపోతే భవిష్యత్తులో తీవ్ర పరిణామాలు ఎదుర్కోవాల్సి ఉంటుందని ఆయన హెచ్చరించారు. ముఖ్యంగా బంగ్లాదేశ్‌లో మారుతున్న ప్రస్తుత రాజకీయ పరిణామాలను దృష్టిలో ఉంచుకుని, గతంలో భారత్ చేసిన త్యాగాలను విస్మరించకూడదని ఆయన పరోక్షంగా సూచించారు. చరిత్రను విస్మరించిన ఏ దేశానికైనా సమయం వచ్చినప్పుడు కాలమే తగిన బుద్ధి చెబుతుందని, కాబట్టి గత అనుభవాలను గుర్తుంచుకుని మెలగడం ఆ దేశానికే శ్రేయస్కరమని ఆయన తన ప్రసంగంలో ఆసక్తికర వ్యాఖ్యలు చేశారు.
భారత సరిహద్దుల భద్రత విషయంలో సైన్యం ఎల్లప్పుడూ అప్రమత్తంగా ఉంటుందని, ధర్మం వైపు నిలబడటమే మన సంస్కృతి అని ఆయన పునరుద్ఘాటించారు. దేశ సమగ్రతను దెబ్బతీసేందుకు ఏ శక్తులు ప్రయత్నించినా తిప్పికొట్టే సామర్థ్యం భారత సైన్యానికి ఉందని ధీమా వ్యక్తం చేశారు. 1971 విజయం కేవలం సైనిక విజయం మాత్రమే కాదు, అది ఒక సిద్ధాంతపరమైన గెలుపు అని.. నేటి తరం సైనికులు కూడా అదే స్ఫూర్తితో దేశ సేవలో నిమగ్నం కావాలని లెఫ్టినెంట్ జనరల్ మనోజ్ కుమార్ కటియార్ పిలుపునిచ్చారు.