సూపర్ స్టార్ రజిని పార్టీని ప్రకటించేది రేపేనా...?
cinema | Suryaa Desk | Published : Wed, Mar 11, 2020, 01:06 PM
తమిళ సూపర్ స్టార్ రజనీకాంత్ పొలిటికల్ ఎంట్రీ ఇప్పటికే కన్ఫర్మ్ అయ్యింది. రాజకీయ పార్టీ ఆవిర్భావానికి ముహూర్తం కూడా ఫిక్స్ చేసినట్లు తెలుస్తోంది. రజనీకాంత్ రాజకీయ పార్టీని ప్రకటించబోతున్నారా? 2021 ఎన్నికలకు రెడీ అయ్యేందుకు ప్రణాళిక సిద్ధం చేస్తున్నారా? అంటే మీడియా వర్గాల్లో ఓ ఆసక్తికర వార్త చక్కర్లు కొడుతోంది. గురువారం నాడు రజనీకాంత్ రాజకీయ పార్టీని ప్రకటిస్తారంటూ ఊహాగానాలు వినిపిస్తున్నాయి. ఆయన అభిమానులు కూడా రజనీకాంత్ పార్టీని ప్రకటించే అవకాశాలు ఉన్నాయని చెబుతున్నారు. రజినీ మక్కల్ మండ్రమ్ (ఆర్ఎంఎం) జిల్లా కార్యదర్శుల సమావేశం ముగిసిన నేపథ్యంలో ఆఫీస్ బేరర్ల సమావేశం గురువారం జరగబోతోంది. ఈ సందర్భంగా రజనీకాంత్ తన రాజకీయ పార్టీని ప్రకటిస్తారని అంతా భావిస్తున్నారు. అదీకాక.. రజనీకాంత్ ఆఫీస్ నుంచి తమకు ఫోన్లు వచ్చాయని ఆర్ఎంఎం ప్రతినిధులు వెల్లడించారు. గురువారం ఉదయం 9 గంటలకు చెన్నైలోని రజనీకాంత్కు చెందిన కల్యాణ మంటపానికి రావాలని ఆదేశాలు వచ్చినట్లు తెలిపారు. ఈ సమావేశంలో రాజకీయ పార్టీని ఎప్పుడు ప్రారంభించబోయేది చెప్పే అవకాశాలున్నాయని స్పష్టం చేశారు.
|
|