విజయ్‌ సేతుపతి నా నోరు మూయించాడు: విజయ్‌

తన స్నేహితుడు అజిత్‌ని ఓ విషయంలో తాను ఫాలో అయ్యానని అన్నారు కోలీవుడ్‌ ప్రముఖ నటుడు విజయ్‌. ఆయన నటించిన పలు చిత్రాలు తమిళంలోనే కాకుండా తెలుగులో కూడా విడుదలవడంతో ఇక్కడి ప్రేక్షకులకు కూడా విజయ్‌ సుపరిచితులయ్యారు. ప్రస్తుతం ఆయన కథానాయకుడిగా నటిస్తున్న చిత్రం 'మాస్టర్‌'. లోకేశ్‌ కనకరాజు దర్శకత్వం వహిస్తున్న ఈ సినిమా ఆడియో విడుదల వేడుక ఆదివారం సాయంత్రం చెన్నైలో జరిగింది. కరోనా వైరస్‌ కారణంగా అతి తక్కువ మందితో ఓ ప్రైవేట్‌ ఫంక్షన్‌లా దీనిని నిర్వహించారు. ఈ కార్యక్రమంలో విజయ్‌ మాట్లాడుతూ.. 'నా హృదయంలో ప్రత్యేకమైన స్థానాన్ని సొంతం చేసుకున్న నా అభిమానులందరికీ వందనం. నేడు 'మాస్టర్‌' ఆడియో విడుదల నా అభిమానుల మధ్య జరగకపోవడం బాధగా ఉంది. కరోనా వైరస్‌ కారణంగా మేము ఈ వేడుకను ఓ ప్రైవేటు కార్యక్రమంలాగా నిర్వహించాల్సి వచ్చింది. ఆ విషయంలో నన్ను క్షమించండి. నా స్నేహితుడు అజిత్‌లాగా నేను కూడా ఈరోజు బ్లేజర్‌ ధరించి ఈ వేడుకకు హాజరయ్యాను' అని చెప్పారు. అనంతరం 'మాస్టర్‌' సినిమాలో ప్రతినాయుకుడి పాత్రను పోషించిన విజయ్‌ సేతుపతి గురించి మాట్లాడుతూ.. 'విజయ్‌ సేతుపతి ప్రస్తుతం చాలా కీలకమైన వ్యక్తిగా మారారు. మనం ఇప్పటి వరకూ చాలా నెగిటివ్‌ పాత్రలను చూశాం. కానీ, మాస్టర్‌ సినిమాలో విజయ్‌ సేతుపతి పోషించిన పాత్ర ఎంతో ప్రత్యేకమైనది. 'మాస్టర్‌' సినిమాలో ప్రతినాయకుడి పాత్రలో నటించడానికి ఎందుకు ఒప్పుకున్నావ్‌? అని విజయ్‌ సేతుపతిని నేను ఓ రోజు అడిగాను. దానికి విజయ్ సేతుపతి 'ఐ రియల్లీ లైక్‌ యూ అనే నాలుగు పదాలు చెప్పి నా నోరు మూయించాడు' అని విజయ్‌ అన్నారు. ఆడియో వేడుకలో భాగంగా విజయ్‌ మాస్టర్‌ సినిమా దర్శకుడు లోకేశ్‌ కనకరాజును మెచ్చుకున్నారు.