18 ఏళ్ల వయస్సులోనే రికార్డులు అవుట్
cinema | Suryaa Desk | Published : Sat, Mar 28, 2020, 01:10 PM
హీరోలకు మాస్ ఆడియన్స్ ని ఎలా దగ్గర చేయాలో తెలిసిన దర్శకులలో వివి వినాయక్ సిద్ధహస్తుడు. యంగ్ టైగర్ ఎన్టీఆర్, వివి వినాయక్ కాంబినేషన్ లో వచ్చిన 'ఆది' సినిమా విడుదలై 18 ఏళ్ళు అవుతుంది. అప్పట్లో 18 ఏళ్ల కుర్రాడు అయిన ఎన్టీఆర్ కోసం మాస్ ఆడియన్స్ ఎగబడేలా చేసిన సినిమా ఆది.18 ఏళ్ల క్రితం వినాయక్ ను పిలిచి మాస్ కథ ఏదైనా ఉంటే చెప్పమన్నారు ఎన్టీఆర్. అప్పటికప్పుడు తన వద్ద మాస్ కథ ఏమీ లేకపోవడంతో ఎప్పుడో రాసుకున్న సీన్లను చెప్పారు వినాయక్. అందులో ఒకటి చిన్నపిల్లాడు బాంబు వేసే సన్నివేశం కాగా.. మరొకటి గాల్లోకి సుమోలు లేచే సన్నివేశం. ఆ రెండు సన్నివేశాలూ చెప్పి, నచ్చితే కథ తయారుచేస్తానని వినాయక్ చెప్పగా, ఫ్యాక్షన్ కథ నాకు మరీ హెవీ అయిపోతుందంటూ దాటవేయబోయారు ఎన్టీఆర్.వారం రోజులు సమయం ఇస్తే కథ రాసుకుని వస్తాను, నచ్చితేనే చేద్దాం లేదంటే వేరెవరికైనా డేట్స్ ఇచ్చేద్దురు అంటూ ఎన్టీఆర్ ని ఒప్పించారు వినాయక్. ఆ రాత్రి వినాయక్ రూంకి వచ్చి కథకు మెరుగులు దిద్దేపనిలో పడ్డాడు. అలా రెండు రోజులు గడిచాకా 58 సీన్లతో ఆది కథని తయారుచేసి ఎన్టీఆర్ కి వినిపించారు. కథ బాగా నచ్చిన ఎన్టీఆర్ ఆ సినిమాకి అంగీకరించారు. అలా మొదలయిన 'ఆది' ఎన్నో రికార్డులను బద్దలుకొట్టి నేటికీ 18 ఏళ్ళు పూర్తి చేసుకుంది.
|
|