సినిమా థియేటర్‌కు వెళ్లేవారికి రూల్స్ ఇవే..

కరోనా మహమ్మారి కారణంగా మూతపడిన థియేటర్లు తొమ్మిది నెలల అనంతరం తెరుచుకున్న సంగతి తెలిసిందే. అన్‌లాక్ ప్రక్రియలో భాగంగా గత అక్టోబర్ నుంచి 50 శాతం ఆక్యుపెన్సీతో థియేటర్లు తెరిచేందుకు కేంద్రం అనుమతిచ్చింది. తాజాగా మరోసారి సడలింపు ఇచ్చిన కేంద్రం.. ఫిబ్రవరి 1 నుంచి వంద శాతం సీటింగ్‌కు అనుమతిస్తూ థియేటర్ యాజమాన్యాలకు శుభవార్త చెప్పింది. ఓ వైపు కరోనా కేసులు క్రమంగా తగ్గుముఖం పట్టడం, మరోవైపు వ్యాక్సినేషన్ ప్రక్రియ ఊపందుకోవడంతో కేంద్ర ఈ నిర్ణయం తీసుకుంది. అటు ప్రేక్షకులు కూడా సినిమా హాల్లో అడుగుపెట్టేందుకు ఆసక్తి చూపిస్తున్నారు. మీరు కూడా సినిమాకు వెళ్లడానికి సిద్దమవుతున్నారా? అయితే, కేంద్ర ప్రభుత్వం జారీ చేసిన ఈ మార్గదర్శకాల గురించి తెలుసుకోండి. సినిమా థియేటర్లోకి ప్రవేశించే ఎంట్రీ పాయింట్ వద్ద ప్రతి ఒక్క ప్రేక్షకుడికి తప్పనిసరిగా థర్మల్ స్క్రీనింగ్ చేయాలి. కరోనా లక్షణాలు లేని వ్యక్తులను మాత్రమే లోపలికి అనుమతించాలి. ప్రవేశం, నిష్క్రమణ పాయింట్ల వద్ద ప్రేక్షకులు గుమి కూడ కుండా ఉండేందుకు సోషల్ డిస్టన్స్ పాటించేందుకు క్యూ గుర్తులను అందుబాటులో ఉంచాలి. మల్టీపెక్స్లలో వేర్వేరు స్క్రీన్‌లలో వేర్వేరు సమయాల్లో సినిమా ప్రదర్శన ప్రారంభించాలి. దీని ద్వారా రద్దీ తగ్గుతుంది.
ప్రేక్షకులు గుమికూడ కుండా సోషల్ డిస్టన్స్ పాటించేలా చర్యలు తీసుకోవాలి. విరామం సమయంలో ప్రేక్షకులు ఎక్కువగా గుమి కూడే అవకాశం ఉన్న లాబీలు, వాష్‌రూమ్‌, క్యాంటీన్ల వద్ద రద్దీ లేకుండా చర్యలు తీసుకోవాలి. ప్రేక్షకులను అనుమతించడానికి ఎక్కువ విరామాలను ఉపయోగించవచ్చు. ఎంట్రీ, ఎగ్జిట్ పాయింట్ల వద్ద రద్దీని నివారించేందుకు మల్టీపెక్స్‌ల్లో ప్రతి స్క్రీన్‌కు వేర్వేరు ఎంట్రీ సమయాలను అనుసరించాలి. టికెట్లు కౌంటర్లు, క్యాంటిన్ల వద్ద డిజిటల్ చెల్లింపులకు ప్రాధాన్యతనివ్వాలి. ఆన్‌లైన్ బుకింగ్‌లు, ఈ–-వాలెట్ల, క్యూఆర్ కోడ్ స్కానర్‌లు మొదలైన వాటిని ఏర్పాటు చేయాలి. రద్దీని తగ్గించేందుకు ఆఫ్లైన్లో కూడా ముందస్తు బుకింగ్కు అనుమతించాలి. ప్రేక్షకులతో పాటు థియేటర్ సిబ్బంది కూడా తప్పనిసరిగా ఫేస్ మాస్కులు ధరించాలి. ఎక్కువ వయసున్న ఉద్యోగులు, గర్భిణీ ఉద్యోగులు, అనారోగ్యంగా ఉన్న ఉద్యోగుల పట్ల మరిన్ని జాగ్రత్తలు తీసుకోవాలి. ప్రేక్షకులు చేయాల్సినవి, చేయకూడనివి, కరోనా నిబంధనలను తప్పనిసరిగా ఎంట్రీ, ఎగ్జిట్ పాయింట్లు, కౌంటర్లు, యాక్సెస్ పాయింట్ల వద్ద ప్రదర్శించాలి. శారీరక దూరాన్ని పాటించడం, పరిశుభ్రత పాటించడం వంటి వాటిని సినిమా ప్రారంభంలో, విరామం సమయంలో ప్రదర్శించాలి. అన్ని థియేటర్లలోని ఎయిర్ కండీషనర్లను 24–30 డిగ్రీల సెల్సియస్ ఉష్ణోగ్రత వద్ద ఉండేలా చూసుకోవాలి. థియేటర్లోని హ్యుమిడిటి 40–70 శాతం పరిధిలో ఉండేలా చర్యలు తీసుకోవాలి. హ్యాండ్ వాషర్స్, శానిటైజర్స్ ఖచ్చితంగా ఏర్పాటు చేయాలి.