‘అర్జున్ రెడ్డి’లా మారిన ధ్రువ్ ను చూడండి
cinema | Suryaa Desk | Published : Tue, Mar 06, 2018, 01:43 PM
గత ఏడాది తెలుగులో సెన్సేషనల్ హిట్టయిన ‘అర్జున్ రెడ్డి’ సినిమాను తమిళ.. హిందీ భాషల్లో రీమేక్ చేస్తున్న సంగతి తెలిసిందే. హిందీ రీమేక్ ఆలస్యమవుతుంది కానీ.. తమిళ రీమేక్ కు సన్నాహాలు పూర్తయ్యాయి. షూటింగ్ కూడా మొదలుపెట్టేస్తున్నారు. ఈ సినిమా కోసం దాదాపు ఆరు నెలలుగా ప్రిపేరవుతున్నాడు విక్రమ్ తనయుడు ధ్రువ్. ఇంతకుముందు ధ్రువ్ బయట కనిపించినప్పటికీ చాక్లెట్ బాయ్ లాగా ఉన్నాడు. ఇతను ‘అర్జున్ రెడ్డి’గా సెట్టవుతాడా అన్న సందేహాలు కూడా కలిగాయి జనాలకు. కానీ ఇప్పుడు అతడి అవతారమే మారిపోయింది. జుట్టు.. గడ్డం పెంచేసి రఫ్ లుక్ లోకి మారిపోయిన ధ్రువ్ ‘అర్జున్ రెడ్డి’ని తలపించేస్తున్నాడు.
‘అర్జున్ రెడ్డి’ రీమేక్ ‘వర్మ’ కోసం ధ్రువ్ తీర్చిదిద్దుకున్న కొత్త లుక్ సోషల్ మీడియాలో ఇప్పుడు వైరల్ అవుతోంది. ధ్రువ్ తండ్రికి తగ్గ తనయుడే అని.. పాత్ర కోసం మేకోవర్ కావడంలో ఇతనూ దిట్టే అని అభిమానులు పొగిడేస్తున్నారు. ‘సేతు’తో విక్రమ్ ను హీరోగా నిలబెట్టి.. ‘పితామగన్’తో అతడికి తిరుగులేని ఇమేజ్ తెచ్చిపెట్టిన బాలా ఈ చిత్రానికి దర్శకత్వం వహిస్తున్న సంగతి తెలిసిందే. ఆయన డైరెక్ట్ చేస్తున్న తొలి రీమేక్ మూవీ ఇది. రీమేక్ అయినప్పటికీ బాలా దీనికి తనదైన టచ్ ఇస్తాడనడంలో సందేహం లేదు. ఈ చిత్రానికి ఓ కొత్త హీరోయిన్ని ఎంచుకోవాలని చూస్తున్నారు. ఆ వేట పూర్తి కావచ్చిందని సమాచారం. విక్రమ్ కు సన్నిహితుడైన ఓ పెద్ద నిర్మాత ఈ చిత్రాన్ని ప్రొడ్యూస్ చేస్తున్నాడు.
|
|