సామాజిక మాధ్య‌మాల‌కు బానిస కావ‌ద్దు

విజయ్‌ దేవరకొండ కథానాయకుడిగా నటిస్తున్న ఏ మంత్రం వేసావె. ఇందులో ఢిల్లికి చెందిన శివానీ సింగ్‌ నాయికగా నటిస్తోంది. శుక్రవారం ప్రేక్షకుల ముందుకువస్తున్న ఈ చిత్రాన్ని మల్కాపురం శివకుమార్‌ నిర్మిస్తున్నారు. శ్రీధర్‌ మర్రి దర్శకుడు.

కథానాయికగా తనకిది తొలి సినిమా అని శివానీసింగ్‌ చెప్పింది. బుధవారం మీడియాతో మాట్లాడుతూ రెగ్యులర్‌ హీరోయిన్ల పాత్రలకి భిన్నంగా నా పాత్ర మలచబడింది. గ్రాడ్యూయేషన్‌ పూర్తిచేశాక మోడలింగ్‌ రంగంలో అడుగుపెట్టాను. పలు బ్రాండ్స్‌కు మోడల్‌గా చేశాను. కొన్ని రిలాయలిటీ షోస్‌కు వ్యాఖ్యాతగా వ్యవహరిస్తున్నాను అని తెలిపింది.

నా స్వస్థలం ఢిల్లిd. అమ్మ టీచర్‌. నాన్నిగారు ఎరోనాటికల్‌ ఇంజనీర్‌. మాది సింపుల్‌ ఫ్యామిలీ. కుటుంబ ప్రోత్సాహంతో మోడలింగ్‌ రంగంలోకి వచ్చాను. వెండితెరపై నేను చూసుకోవాలనే కోరిక ఈ చిత్రంతో నెరవేరనుంది. ఈ సినిమా కోసం నిర్వహించిన ఆడిషన్స్‌లో ఎంపికయ్యాను. అలా అదృష్టం కలిసివచ్చి హీరోయిన్‌ అయ్యాను అని శివాని సింగ్‌ చెప్పింది.

సినిమాలో తన పాత్ర గురించి చెబుతూ తెలివితేటలున్న ధైర్యవంతురాలైన అమ్మాయిగా కనిపిస్తాను. నిజాయితీ, మంచితనం కలగలిసిన నవతరం అమ్మాయిలకు ప్రతీకగా నా పాత్ర మలచబడింది. నా పాత్రలోని భావోద్వేగాలు ప్రతి ఒక్కరికీ కనెక్ట్‌ అవుతాయనే నమ్మకం ఉంది అని చెప్పింది. హీరోగా నటించిన విజయ్‌ దేవరకొండ పాత్ర గురించి మాట్లాడుతూ సోషల్‌ మీడియాకు అలవాటుపడిన యువకుడిగా విజయ్‌ క్యారెక్టర్‌ కనిపిస్తుంది. ఆయనతో కలిసి నటించడం సంతోషంగా ఉంది. షూటింగ్‌ సరదాగా సాగింది. చిత్రీకరణ సమయంలో విజయన్‌ నన్ను ఆటపట్టించేవాడు. తెలుగు పలకడం రానప్పటికీ విజయ్‌ సహకారంతో పాటుగా టీమ్‌ అందరు కోఆపరేషన్‌ చేశారు. హిందీ, ఇంగ్లీష్‌లో నా డైలాగ్స్‌ రాసుకుని చెప్పేదాన్ని. అలా మెల్లిగా నా పాత్ర తాలుకు సంభాషణలు అర్థం చేసుకుని చెబుతూ నటించాను. 2014లో ఈ సినిమా అంగీకరించాను. విడుదల కొంత ఆలస్యం జరిగింది. సినిమా ఎప్పుడు రిలీజ్‌ అయినా ప్రేక్షకులు ఆదరిస్తారనే నమ్మకం ఉంది. భారీ స్థాయిలో ఈ సినిమా రిలీజ్‌ కావడం ఆనందంగా ఉంది. ఇప్పుడున్న ఆధునిక జీవనశైలిలో సామాజిక మాధ్యమాలు వాడటం మంచిదే. అవసరం కూడా. అలాగని వాటికి బానిసకాకూడదు. నేను మాత్రం సోషల్‌ మీడియా లేకున్నా ఉండగలను. సాంకేతిక వల్ల నా వృత్తికి ఎలాంటి ఇబ్బంది ఉండకూడదనేది నా అభిప్రాయం.

చిత్ర పరిశ్రమలోనే కాకుండా అన్ని రంగాల్లో మహిళలపై అఘాయిత్యాలు జరుగుతున్నాయి. వాటిని ఎదురించే ధైర్యం మహిళల్లో రావాలి. అందరూ సమానమనే భావన కలగాలి. అప్పుడే సమాజంలో మార్పు వస్తుంది. మహేష్‌బాబు, అక్షయ్‌కుమార్‌, హృతిక్‌ రోషన్‌ అంటే ఇష్టం. నేను నటించబోయే కొత్త సినిమాలకు సంబంధించి చర్చలు జరుగుతు న్నాయి అని శివాని సింగ్‌ తెలిపింది.