పవన్, హరీష్ శంకర్ సినిమాపై న్యూ అప్‌డేట్

ఈ రోజు పవన్ కళ్యాణ్ 50వ పుట్టినరోజు జరుపుకుంటున్నారు. ఈ సందర్భంగా ఆయన సినిమాలకు సంబంధించిన వరుస అప్‌డేట్స్ ఇస్తున్నారు. తాజాగా పవన్ కళ్యాణ్.. హరీష్ శంకర్ దర్శకత్వంలో చేయబోయే సినిమాకు సంబంధించిన క్రేజీ అప్‌డేట్ ప్రకటించారు. ప్రస్తుతం పవన్ కళ్యాణ్.. మలయాళంలో హిట్టైన ‘అయ్యప్పనుమ్ కోషియమ్’ సినిమాను రీమేక్ చేస్తున్న సంగతి తెలిసిందే.

ఈ చిత్రంలో పవన్ కళ్యాణ్ ‘భీమ్లా నాయక్’  పాత్రలో నటిస్తున్నారు. దీంతో ఈ చిత్రానికి అదే టైటిల్ ఖరారు చేసారు. అంతేకాదు ఈ సినిమాకు సంబంధించిన టైటిల్ సాంగ్‌ రిలీజ్ చేస్తే మంచి రెస్పాన్స్ వచ్చింది.   మరోవైపు ఈ సినిమాలో రానా దగ్గుబాటి మరో హీరోగా నటిస్తున్నారు. ఈ చిత్రంలో డేనియల్ శేఖర్ పాత్రలో కనిపించనున్నారు. త్రివిక్రమ్ మాటలు అందిస్తోన్న ఈ చిత్రానికి సాగర్ చంద్ర డైరెక్ట్ చేస్తున్నారు. ఈ చిత్రాన్ని సంక్రాంతి కానుకగా విడుదల చేస్తున్నట్టు ప్రకటించారు. కానీ ఈ సినిమాను శివరాత్రికి రిలీజ్ చేయాలనే ఆలోచనలో ఉన్నట్టు సమాచారం.

ఆ సంగతి పక్కన పెడితే..  ఇంకోవైపు పవన్ కళ్యాణ్.. క్రిష్ దర్శకత్వంలో ‘హరి హర వీరమల్లు’ సినిమా చేస్తున్నాడు. ఫస్ట్ టైమ్ పవన్ కళ్యాణ్ కెరీర్‌లో చేస్తోన్న చారిత్రక నేపథ్యమున్న సినిమా ఇది. ఈ సినిమాపై భారీ అంచనాలే ఉన్నాయి. దాదాపు రూ. 150 కోట్ల భారీ బడ్జెట్‌తో ఈ సినిమా తెరకెక్కిస్తున్నారు. ఈ చిత్రాన్ని 29 ఏప్రిల్  2022 న విడుదల చేస్తున్నట్టు ప్రకటించారు.  ‘భీమ్లా నాయక్’ తర్వాత పవన్ కళ్యాణ్ ఈ సినిమా పూర్తి చేయనున్నారు. 

ఈ సినిమాల తర్వాత పవన్ కళ్యాణ్.. హరీష్ శంకర్ దర్శకత్వంలో నెక్ట్స్ మూవీ చేయనున్నారు. ఇప్పటికే ఈ సినిమాకు సంబంధించిన అఫీషియల్ ప్రకటన కూడా చేసారు. తాజాగా పవన్ కళ్యాణ్ బర్త్ డే సందర్భంగా పవన్ కళ్యాణ్ బైక్ పై కూర్చొని .. బ్యారెల్ గన్‌ను లోడ్ చేస్తున్న పవన్ కళ్యాణ్ ప్రీ లుక్‌ను విడుదల చేసారు. ఈ లుక్‌లో ఫుల్లీ లోడెడ్ అంటూ మరోసారి ఎంటర్టేన్మెంట్‌కు సిద్ధంగా ఉండండి అంటూ హరీష్ శంకర్ అభిమానులకు పిలుపు ఇచ్చారు.