'గని' మూవీ పై వరుణ్ ఎమోషనల్ ట్వీట్...
cinema | Suryaa Desk | Published : Tue, Apr 12, 2022, 09:20 PM
కొత్త దర్శకుడు సాయి కొర్రపాటి డైరెక్షన్లో, మెగా ప్రిన్స్ వరుణ్ తేజ్ నటించిన కొత్త చిత్రం గని. బాక్సింగ్ నేపథ్యంలో సాగే ఈ సినిమా లో సయీ మంజ్రేకర్ కధానాయిక. కన్నడ స్టార్ హీరో ఉపేంద్ర, జగపతి బాబు, బాలీవుడ్ సీనియర్ నటుడు సునీల్ శెట్టి, నరేష్, నవీన్ చంద్ర, నదియా కీలక పాత్రలు పోషించిన ఈ చిత్రాన్ని అల్లు అరవింద్ సమర్పణలో అల్లు బాబీ, సిద్దు నిర్మించారు. కరోనా కారణంగా విడుదల ఆలస్యమైన ఈ సినిమా ఎట్టకేలకు ఏప్రిల్ 8న ప్రేక్షకుల ముందుకు వచ్చింది. మొదటి షో నుండే డివైడ్ టాక్ తెచ్చుకున్న ఈ సినిమా ప్రేక్షకుల అంచనాలను అందుకోవడంలో విఫలమయ్యింది. కలెక్షన్ల పరంగా బాక్సాఫీస్ వద్ద డిజాస్టర్ గా నిలవబోతుంది ఈ సినిమా. విడుదలకు ముందు పాతిక కోట్ల ప్రీ రిలీజ్ బిజినెస్ చేసిన ఈ సినిమా బయ్యర్లకు భారీ నష్టాలని మిగల్చటం ఖాయమని ట్రేడ్ పండితుల అంచనా వేస్తున్నారు.
తాజాగా ఈ మూవీ ఫలితంపై వరుణ్ సోషల్ మీడియాలో ఒక ఎమోషనల్ పోస్టును షేర్ చేసాడు. "గని సినిమా కోసం కష్టపడ్డ ప్రతి ఒక్కరికి పేరుపేరునా ధన్యవాదాలు. ముఖ్యంగా అల్లుబాబి, సిద్ధూ ముద్దలకు నేను ఎన్నటికీ రుణపడి ఉంటా. ఒక మంచి ఉద్దేశం తో గని సినిమాను ప్రేక్షకుల ముందుకు తీసుకొచ్చాము. అయితే మేము అనుకున్నట్టుగా ఈ సినిమా ప్రేక్షకులకు రీచ్ అవ్వలేకపోయింది. ప్రతి సెకను, ప్రతి నిమిషం సినిమా కోసమే నేను కష్టపడుతుంటా. ప్రేక్షకులను ఎంటర్టైన్ చెయ్యాలనేదే నా ప్రధాన ఎజెండా. ఆ క్రమంలో ఒక్కోసారి విజయం సాధిస్తే మరోసారి ఓడిపోతుంటాం. అయితే కష్టపడటం మాత్రం ఎప్పటికీ ఆపను..." అంటూ ట్విట్టర్లో పోస్ట్ చేసాడు వరుణ్.
|
|