ఆమె సులభంగా సందేశాలు ఇస్తుంది: గాయని చిన్మయి
cinema | Suryaa Desk | Published : Sat, Aug 11, 2018, 10:52 AM
అగ్ర కథానాయిక సమంతకు పాత్రల ఎంపికలోనే కాదు.. ఫ్యాషన్లోనూ మంచి అభిరుచి ఉంది. సినిమా వేడుకలు, ఇంటర్వ్యూలు, సమావేశాల్లో.. విభిన్న లుక్లో కనిపించి ఆకట్టుకుంటూనే ఉంటారు. అయితే పెళ్లి నగల గురించి సామ్ ఆలోచించిన తీరును ఆమె స్నేహితురాలు, గాయని చిన్మయి అందరితో పంచుకున్నారు. ఓ నెటిజన్ ట్విటర్ వేదికగా ‘సమంత గురించి చెప్పండి’ అని చిన్మయిని అడిగారు.
దీనికి గాయని స్పందిస్తూ.. సామ్ అందరికీ స్ఫూర్తిదాయకమని అన్నారు. ‘సామ్ తన పెళ్లి నగల ఎంపిక గురించి నాకు ఓ విషయం చెప్పింది. మెడకు ఒక్క నగ, జడకు ఒక్క నగ చాలు అంది. అంతేకాదు అందులో డైమండ్స్ ఉండకూడదని అంది. ఏ పెళ్లి కుమార్తె అయినా సులభంగా అనుకరించడానికి ఆమె లుక్ ఓ ఉదాహరణ. ఇలా సామ్ ఎంతో సులభంగా ఇచ్చే సామాజిక సందేశాలు (ప్రకటనలు) నాకు ఎంతో నచ్చుతాయి’ అని ఆమె ట్వీట్ చేశారు.
పెళ్లి కుమార్తె అనగానే ఎక్కువ బంగారం, డైమండ్స్ ధరించి ఆడంబరంగా సిద్ధం కావడం ఈ రోజుల్లో సాధారణం అయిపోయింది. దీనికి విభిన్నంగా, సింపుల్గా సామ్ కొత్త ట్రెండ్ సృష్టించడాన్ని చిన్మయి ఇలా మెచ్చుకున్నారు. ఇష్టమైన నటి ఓ ట్రెండ్ సెట్ చేస్తే దాన్ని అభిమానులు సైతం ఫాలో అవుతుంటారన్న సంగతి తెలిసిందే. సమంతకు చిన్మయి డబ్బింగ్ చెబుతుంటారు. ‘ఏ మాయ చేసావె’, ‘దూకుడు’, ‘ఈగ’, ‘ఎటో వెళ్లిపోయింది మనసు’, ‘సీతమ్మవాకిట్లో సిరిమల్లె చెట్టు’, ‘అత్తారింటికి దారేది’, ‘మనం’... తదితర చిత్రాల నుంచి గత ఏడాది వచ్చిన ‘రాజుగారి గది 2’ వరకు సామ్ పాత్రలకు ఆమే స్వరం ఇచ్చారు.
|
|