గోవాలో రొమాన్స్ చేస్తున్న శైలజా రెడ్డి అల్లుడు
cinema | Suryaa Desk | Published : Sat, Aug 11, 2018, 10:56 AM
ఈ నెలాఖరులో విడుదలకు సన్నద్ధం అవుతోంది ‘శైలజా రెడ్డి అల్లుడు’. నాగచైతన్య, అనూ ఇమాన్యుల్ హీరోహీరోయిన్లుగా మారుతి దర్శకత్వంలో రమ్యకృష్ణ శైలజారెడ్డిగా కనిపిస్తున్న ఈ సినిమా షూటింగ్ దాదాపు ముగిసింది. అయితే ఒక సాంగ్కు సంబంధించిన షూటింగ్ గోవాలో జరిగింది. అది కూడా ఇప్పటికే ముగిసింది. ఈ నేపథ్యంలో అందుకు సంబంధించిన స్టిల్స్ను విడుదల చేశారు. ప్రస్తుతం చైతూ, సమంతలు గోవాలో ఉన్న నేపథ్యంలో దర్శకుడు మారుతి ఈ పాట చిత్రీకరణను కూడా అక్కడే పెట్టుకున్నట్టుగా తెలుస్తోంది. ఇంతటితో ఈ సినిమా షూటింగ్ ముగిసినట్టే అని సమాచారం. ఆగస్టు31వ తేదీన ఈ సినిమా విడుదల కానుంది. ఈ సీజన్లో సినీ ప్రేక్షకుల్లో బాగా ఆసక్తిని రేకెత్తిస్తున్న సినిమా ‘శైలజారెడ్డి అల్లుడు’. ఈ మధ్య కాలంలో రొమాంటిక్ కామెడీలతో ఆకట్టుకొంటూ వస్తున్నాడు దర్శకుడు మారుతి. ఇటీవల ఈయన కథను అందించిన ‘బ్రాండ్ బాబు’ డిజాస్టర్ అయినా.. ‘శైలజారెడ్డి అల్లుడు’పై ఆ ప్రభావం లేనట్టే.
ఇప్పటికే ఈ సినిమా టీజర్, పాటకు సంబంధించిన టీజర్ ఆకట్టుకున్నాయి. ఇంకా ట్రైలర్ విడుదల కావాల్సి ఉంది. ఇదివరకూ అత్తా-అల్లుళ్ల ఫ్యామిలీ డ్రామాలు తెలుగు నాట సూపర్ హిట్స్ గా నిలిచాయి. ఆ పరంపరలో ‘శైలజారెడ్డి అల్లుడు’ కూడా హిట్ అనిపించుకుంటుందేమో చూడాల్సి ఉంది.
|
|