ఉపాసన ‘బి పాజిటివ్’.. కవర్‌పేజ్‌పై ‘రాంబో’ రామ్ చరణ్!

వినయ విధేయ రామ’ సినిమాలో మెగా పవర్ స్టార్ రామ్ చరణ్ న్యూ లుక్ చూసినవారంతా అచ్చం రాంబోలా ఉన్నాడంటున్నారు. కండలు తిరిగిన దేహం, చాతిపై పచ్చబొట్లతో మునుపెన్నడూ లేని విధంగా చరణ్ కనిపిస్తున్నారు. వాస్తవానికి బోయపాటి శ్రీను, రామ్ చరణ్ కాంబినేషన్ అనగానే అంచనాలు భారీగా ఏర్పడ్డాయి. ఇప్పుడు ఈ సినిమాలో రామ్ చరణ్ కొత్త లుక్ చూసి అరాచకమే అని అభిమానులు తెగ సంబరపడిపోతున్నారు. చరణ్ కొత్త లుక్ ప్రేక్షకులకే కాదు ఆయన సతీమణి ఉపాసనకు కూడా బాగా నచ్చేసినట్టుంది. అందుకే ఆమె చీఫ్ ఎడిటర్‌గా వ్యవహరిస్తోన్న ‘బి పాజిటివ్ - హెల్త్ అండ్ లైఫ్‌స్టైల్’ మ్యాగజైన్‌లో రామ్ చరణ్ ఫిట్‌నెస్, వర్కౌట్స్ గురించి ఒక ఆర్టికల్‌ను ప్రచురించారు. 

జనవరి 2019 ఎడిషన్‌లో ఈ కథనం ఉంటుంది. రామ్ చరణ్ ఫొటోతో ఉన్న కవర్‌పేజ్‌ను మంగళవారం ఉపాసన ట్విట్టర్ ద్వారా అభిమానులతో పంచుకున్నారు. ‘మై బాడీ ఈజ్ మై టెంపుల్’ అని రామ్ చరణ్ చెప్పినట్లు క్యాప్షన్ కూడా పెట్టారు. కవర్‌పేజ్‌పై రామ్ చరణ్ ఫొటో కూడా అద్భుతంగా ఉంది. జిమ్ టీషర్ట్‌ వేసుకున్న చరణ్ డంబెల్స్‌ను ఎత్తుతున్న ఫొటో అది. మొత్తానికి ఇది కూడా సినిమా ప్రచారానికి బాగా పనికొస్తుందనడంలో ఎలాంటి సందేహం లేదు. 

అపోలో హాస్పిటల్స్ లైనేజ్‌ ద్వారా ఉపాసన సమాజానికి సేవ చేస్తోన్న సంగతి తెలిసిందే. అపోలో ఛారిటీలో సభ్యురాలైన ఈమె 2015లో ‘బి పాజిటివ్’ మ్యాగజైన్‌ను ప్రారంభించారు. ఇందులో ఆరోగ్యం, ఫిట్‌నెస్, లైఫ్‌స్టైల్, డైట్, న్యూట్రీషన్‌కు సంబంధించిన కథనాలను డాక్టర్ల సూచనల మేరకు ప్రచురిస్తున్నారు. ఇప్పటికే ఒకసారి రామ్ చరణ్ ఈ మ్యాగజైన్ కవర్‌పేజ్‌పైకి ఎక్కారు.