సాహో లో ప్రభాస్ తో పాప్ సింగర్ బేయాన్స్
cinema | Suryaa Desk | Published : Fri, Jan 18, 2019, 05:22 PM
ఎంత వద్దనుకున్నా ప్రతి సినిమాకు రెండేళ్ళ గ్యాప్ తప్పని డార్లింగ్ ప్రభాస్ కు బాహుబలి తర్వాత కూడా కష్టాలు తప్పడం లేదు. అందుకే సాహో కోసం అభిమానుల ఎదురు చూపులు ఇంకా కొనసాగుతూనే ఉన్నాయి. ఆగస్ట్ 15 అని ప్రకటించేసారు కాబట్టి దానికే కట్టుబడి ఉండాలని కోరుతున్నారు. దాని సంగతి అలా ఉంచితే సాహోలో చాలా స్పెషల్స్ ఉన్నాయన్న అప్ డేట్స్ కొత్త కిక్ ఇస్తున్నాయి. యాక్షన్ మూవీనే అయినప్పటికీ ఇందులో థ్రిల్ ఇచ్చే అంశాలు చాలా ఉంటాయట.
లేటెస్ట్ బైట్ ప్రకారం ఇందులో ప్రముఖ పాప్ సింగర్ బేయాన్స్ ఓ పాటలో ప్రభాస్ తో కలిసి డాన్స్ చేయబోతున్నట్టు తెలిసింది. సుప్రసిద్ధ బాలీవుడ్ కొరియోగ్రాఫర్ వైభవి మర్చంట్ నేతృత్వంలో త్వరలోనే దీన్ని షూట్ చేయబోతున్నట్టు తెలిసింది. మతులు పోగొట్టే ఖరీదైన సెట్టింగ్స్ తో పాటు వేలాది జూనియర్ ఆర్టిస్టుల సమక్షంలో నభూతో నభవిష్యత్ అనే రీతిలో ఉండబోతున్నట్టు యూనిట్ సమాచారం. అంతే కాదు వందలాది బ్రెజిల్ డాన్సర్లు కూడా ఇందులో ఉంటారట. ఈ పాట తర్వాత్ ఒక హై వోల్టేజ్ యాక్షన్ సీక్వెన్స్ ఉంటుందని తెలిసింది.
మరో టాక్ ప్రకారం సాహోలో ప్రభాస్ రెండు షేడ్స్ ఉన్న పాత్రలలో కనిపించనున్నట్టు సమాచారం. ఒకటి స్వతంత్రం పూర్వం ఒకటి వర్తమానంలో వస్తుందని టాక్. ఇది నిజమో కాదో కాని ఫ్యాన్స్ కి మాత్రం ఫుల్ కిక్కిచ్చే వార్తే. శ్రద్ధా కపూర్ హీరొయిన్ గా పరిచయమవుతున్న సాహోలో భారీ ఎత్తున బాలీవుడ్ తారాగణం నటిస్తోంది. మల్టీ లాంగ్వేజ్ లో రూపొందుతున్న సాహో విడుదలకు ఏడు నెలలే సమయం ఉన్న నేపధ్యంలో యూనిట్ షూటింగ్ తో పాటు మరోపక్క పోస్ట్ ప్రొడక్షన్ ని కూడా వేగవంతం చేసింది
|
|