వైరముత్తు పై సంచలన ఆరోపణలు చేసిన చిన్మయి

ఒకటి రెండు కాదు.. ఏకంగా ఎనిమిది జాతీయ అవార్డులు గెలిచిన గేయ రచయిత వైరముత్తు. ఇండియాలో మరే లిరిసిస్టూకూ సాధ్యం కాని ఘనత ఇది. ఇంకా మరెన్నో ప్రతిష్టాత్మక పురస్కారాలు అందుకుని ఎనలేని గౌరవం పొందారాయన. అలాంటి వ్యక్తిపై లైంగిక వేధింపుల ఆరోపణలు చేసి సంచలనం సృష్టించింది గాయని, డబ్బింగ్ ఆర్టిస్ట్ చిన్మయి. ఆమె ఏదో బురద చల్లడానికి వైరముత్తుపై ఆరోపణలు చేసినట్లు లేదు. తనతో పాటు వైరముత్తు వల్ల బాధ పడ్డ మరెంతోమంది అమ్మాయిల కేస్ స్టడీస్ ఆమె ఉదాహరణగా చూపించింది. చిన్మయి పోరాటంలో నిజాయితీ ఉందనే మెజారిటీ జనాలు అభిప్రాయపడ్డారు. మొత్తానికి ఈ వ్యవహారంలో వైరముత్తు ఇమేజ్ బాగానే డ్యామేజ్ అయింది. ఆయన్ని జనాలు అనుమానాస్పదంగానే చూస్తున్నారు.

ఇదిలా ఉంటే.. వైరముత్తు ఇప్పుడు ఆశ్చర్యకరంగా కాపీ ఆరోపణలు కూడా ఎదుర్కొంటున్నారు. తాను రాసిన పాట తాలూకు క్రెడిట్ వైరముత్తు తీసుకున్నట్లుగా కార్తిక్‌ నేత అనే యంగ్ లిరిసిస్ట్ ఆరోపించడం సంచలనం రేపుతోంది. ఇటీవలే మంచి విజయం సాధించిన ‘96’ సినిమాతో కార్తీక్ చాలా మంచి పేరు సంపాదించాడు. ఐతే తనకంటూ గుర్తింపు లేని సమయంలో ‘వాగై సూడ వా’ సినిమా కోసం ‘సర సర’ అనే పాట రాశానని.. కానీ సినిమాలో మాత్రం వైరముత్తు ఆ పాట రాసినట్లు టైటిల్స్‌లో వేశారని అతను ఆరోపించాడు. ఈ సినిమాకు హైప్ రావాలంటే పేరున్న సాహితీ రచయితకు పాట క్రెడిట్‌ ఇవ్వాలనుకుంటున్నట్లు దర్శకుడు తనకు చెప్పాడని.. దీన్ని పెద్ద విషయం చేయొద్దని కూడా కోరాడని కార్తీక్ ఓ ఇంటర్వ్యూలో పేర్కొన్నాడు.

తాను వైరముత్తు నుంచి ఎంతో స్ఫూర్తి పొందానని.. అలాంటిది ఆయనే తన పాట క్రెడిట్ తీసుకోవడం బాధ కలిగించిందని అన్నాడు కార్తీక్. వైరముత్తు చాలామంది విషయంలో ఇలా చేసినట్లు కూడా అతను ఆరోపించడం గమనార్హం. ‘వాగై సూడ వా’ సంగీత దర్శకుడు జిబ్రాన్‌ కూడా పరిశ్రమకు కొత్త కావడంతో అతను కూడా ఈ విషయాన్ని వ్యతిరేకించలేదన్నాడు. కార్తీక్ ఇంటర్వ్యూకు సంబంధించిన వీడియో ప్రస్తుతం సోషల్ మీడియాలో వైరల్ అవుతోంది. కొంత కాలంగా వైరముత్తుకు వ్యతిరేకంగా మాట్లాడుతున్న చిన్మయికి కార్తీక్ ఇంటర్వ్యూ వీడియో వరంలా మారింది. దాన్ని ఆమె షేర్ చేస్తూ ఇదీ వైరముత్తు నిజస్వరూపం అంటూ విమర్శలు గుప్పించింది. ఐతే తన ఇంటర్వ్యూపై కార్తీక్ స్పందిస్తూ.. ఈ ఇంటర్వ్యుూ ఇచ్చినట్లు.. అందులో అలా మాట్లాడినట్లు తనకు గుర్తు లేదన్నాడు. తాను ఇప్పుడు దీనిపై ఏమీ మాట్లాడలేనని.. చెన్నైకి వచ్చిన తర్వాత ప్రకటన విడుదల చేస్తానని అన్నాడు.