పరిటాల వారింట పెళ్లికి వివేక్ ఒబరాయ్
cinema | Suryaa Desk | Published : Mon, Oct 02, 2017, 01:07 PM
బయోగ్రఫీలు చాలానే వస్తున్నాయి. ఈ మధ్యన అదో ట్రెండ్ గా మారింది. కానీ.. మిగిలిన బయోగ్రఫీలకు పరిటాల రవి పేరిట ప్రముఖ దర్శకుడు రాంగోపాల్ వర్మ తీసిన రక్తచరిత్ర కాస్త భిన్నమని చెప్పాలి. ఒక బయోగ్రఫీని చేసిన ఒక నటుడు.. తాను చేసిన పాత్రకు లింక్ కావటం.. వారి కుటుంబానికి.. అక్కడి ప్రజలకు దగ్గర కావటం చాలా తక్కువని చెప్పాలి.
కానీ.. ఆ విషయంలో పరిటాల రవి క్యారెక్టర్ ను రీల్ లైఫ్ లో పోషించిన బాలీవుడ్ నటుడు వివేక్ ఒబరాయ్ మాత్రం భిన్నమని చెప్పాలి. పరిటాల రవి పాత్ర తర్వాత తెలుగు ప్రజలకు చాలా దగ్గరైపోయారు. మరీ.. ముఖ్యంగా ఏపీ ప్రజలతో ఆయన మమేకం అయ్యారని చెప్పాలి. ఏపీలో జరిగే పలు కార్యక్రమాలకు ఆయన హాజరు కావటం కనిపిస్తుంది. చివరకు 2014 ఎన్నికల్లో టీడీపీ విజయం సాధించి.. చంద్రబాబు సీఎంగా ప్రమాణ స్వీకారం చేసిన సమయంలోనే ఈ రీల్ రవికి ప్రత్యేక ఆహ్వానం అందటాన్ని మర్చిపోకూడదు.
రీల్ రవిగా అందరి మదిలో నిలిచిన వివేక్ ఒబరాయి అంటే రియల్ పరిటాల కుటుంబానికి ప్రత్యేక అభిమానమని చెప్పాలి. రక్తచరిత్ర సినిమాతో పరిటాల కుటుంబంతో వివేక్ కు ప్రత్యేక అనుబంధం ఏర్పడింది. ఆ సినిమా నుంచి వారితో చక్కటి సంబంధాలున్న వివేక్ ను పరిటాల శ్రీరామ్ పెళ్లి వేడుకకు ఆహ్వానించారు.
దీనికి తగ్గట్లే రీల్ రవి కుటుంబ సమేతంగా హాజరు కావటం అందరి దృష్టిని విపరీతంగా ఆకర్షించింది. వివేక్ ఒబరాయ్ ఆయన సతీమణిని ఏపీ మంత్రి పరిటాల సునీత స్వయంగా స్వాగతం పలికారు. ఏమైనా ఒక బయోగ్రఫీ చేశాక సదరు ఫ్యామిలీతో చక్కటి సంబంధాలు ఉండటం విశేషంగానే చెప్పాలి.
|
|