కాజల్ అగర్వాల్ ఆస్తమా పేషెంట్ అట

తెరపై అందంగా, ఆకర్షణీయంగా కనిపించే హీరో హీరోయిన్లకు ఏ సమస్యా ఉండదని అనుకుంటాం. కానీ వాళ్లు కూడా మానవ మాత్రులే. వాళ్లకూ ఇబ్బందులుంటాయి. అనారోగ్య సమస్యలు వేధిస్తుంటాయి. కానీ గ్లామర్ ఫీల్డులో ఉన్నవాళ్లు తమకున్న అనారోగ్య సమస్యల గురించి బయటికి చెప్పుకోవడానికి ఇష్టపడరు. అలా చెప్పుకుంటే జనాల దృష్టికోణం మారిపోతుందని.. అవకాశాలు తగ్గిపోతాయని ఆందోళన చెందుతారు.

కానీ ఈ మధ్య తారల ఆలోచన తీరు మారుతోంది. తమ అనారోగ్య సమస్యల గురించి ఓపెన్‌గా మాట్లాడేస్తున్నారు. జనాలు కూడా ఈ విషయాల్ని సానుకూల ధోరణిలో తీసుకుంటున్నారు. కొన్నేళ్ల కిందట దీపికా పదుకొనే తనకున్న డిప్రెషన్ సమస్య గురించి సంచలన విషయాలు వెల్లడించింది. ఆత్మహత్య చేసుకోవాలనుకునే వరకు తన ఆలోచన వెళ్లిందని కూడా చెప్పింది.

ఇక ఈ మధ్యే రష్మి గౌతమ్ సైతం తాను ఎదుర్కొన్న పెద్ద అనారోగ్య సమస్య గురించి వెల్లడించింది. తాజాగా కాజల్ సైతం తనకు ముందు నుంచి ఉన్న ఇబ్బంది గురించి వెల్లడించింది. కాజల్ ఆస్తమా పేషెంట్ అట. ఈ సమస్య తనకు చాలా కాలంగా ఉందని ఆమె తెలిపింది. తాజాగా కాజల్ ఒక సామాజిక సేవా కార్యక్రమంలో భాగంగా ముంబయిలో ఒక మారథాన్‌లో పాల్గొంది. ఆ పరుగు పూర్తి చేయడానికి ఆమె చాలా ఇబ్బంది పడిందట. ఒక దశ వరకు బాగానే ఉన్నప్పటికీ చివర్లో పరుగు తీయడం చాలా కష్టమైందని.. తనకు ఆస్తమా ఉండటమే ఇందుక్కారణమని కాజల్ చెప్పింది. కాజల్‌కు ఈ సమస్య ఉందని తెలియగానే సోషల్ మీడియాలో ఆమె అభిమానులు ఆశ్చర్యపోతున్నారు. ఆవేదన చెందుతున్నారు. తన సమస్య గురించి ఇలా ఓపెన్‌గా చెప్పిన కాజల్‌ను అభినందిస్తున్నారు కూడా.