డబ్బింగ్ చిత్రాలు రెండు డిజాస్టర్లే
cinema | Suryaa Desk | Published : Sun, Feb 17, 2019, 02:12 PM
టీజర్తోనే విపరీతమైన అంచనాలు రేకెత్తించి సోషల్ మీడియాలో నేషనల్ వైడ్ ట్రెండ్ అవడమే కాకుండా, సెలబ్రిటీలనుంచి కూడా ట్వీట్లు వేయించుకున్న 'ఒరు అడార్ లవ్' అలియాస్ 'లవర్స్ డే' డిజాస్టర్ టాక్ తెచ్చుకుంది. కేవలం టీజర్ తీసి, దాని చుట్టూ ఏదో ఒక కథ అల్లేసి తీసేసిన ఈ చిత్రం అందరి చేత అక్షింతలు వేయించుకుంటోంది. ఇంత క్రేజ్ తెచ్చుకుని ఇలాంటి తలకుమాసిన సినిమా తీస్తారా అంటూ తిట్టి పోస్తున్నారు. మామూలుగా అయితే ఈ చిత్రాన్ని ఎవరూ పట్టించుకునే వారే కాదు. కానీ అంత హైప్ రావడం వల్ల తొలిరోజు కుర్రకారు బాగానే చూసారు.
ప్రేమికుల రోజున ఈ చిత్రం పెట్టిన నరక యాతన భరించలేక సోషల్ మీడియాలో దుమ్మెత్తి పోసారు. ఇదిలావుంటే దీంతో పాటే విడుదలైన కార్తీ చిత్రం 'దేవ్' కూడా విపరీతంగా డిజప్పాయింట్ చేసింది. కార్తీ సినిమాల్లో కథా విలువలు వుంటాయని నమ్మే వాళ్లని ఈ చిత్ర దర్శకుడు దారుణంగా మోసం చేసాడు. ఈ రెండు చిత్రాలు తెలుగులోనే కాకుండా ఒరిజినల్లో కూడా ఫ్లాప్ టాక్ తెచ్చుకుని డిజాస్టర్ దిశగా పయనిస్తున్నాయి. తెలుగు బాక్సాఫీస్ వద్ద మరో డల్ వీకెండ్ తప్పలేదన్నమాట. వచ్చే వారం రానున్న ఎన్టీఆర్ బయోపిక్ రెండవ భాగం అయినా కాస్త చలనం తెస్తుందో లేదో చూడాలిక.
|
|