సాంగ్ రివ్యూ: లక్ష్మీస్ వీరగ్రంథం ద్రోహం.. విద్రోహం...

నటసార్వభౌముడు, తెలుగు ప్రజల అభిమాన నాయకుడు స్వర్గీయ నందమూరి తారక రామారావు జీవితం ఎందరికో ఆదర్శం. ఆయన సినీ జీవితం మొదలుకొని రాజకీయం జీవితం ముగిసేంత వరకు ఎన్నో మలుపులు. సినిమాల్లో అగ్రకథానాయకుడిగా వెలుగొందిన ఎన్టీఆర్.. అనంతరం తన శేష జీవితాన్ని ప్రజాసేవకు అంకితం చేయాలని తెలుగుదేశం పార్టీని స్థాపించారు. ఆ తరవాత ఏమైందో తెలుగు ప్రజలకు ప్రత్యేకంగా చెప్పాల్సిన అవసరం లేదు. తెలుగు ప్రజలకు ఇంచుమించుగా తెలిసిన కథనే ఆసక్తికరంగా తెరపై చూపించాలని నందమూరి బాలకృష్ణ నిర్ణయించారు. ఎన్టీఆర్ సినీ జీవితాన్ని ‘కథానాయకుడు’గా.. రాజకీయ చరిత్రను ‘మహానాయకుడు’గా తీసుకొచ్చారు.

అయితే, కేవలం ఎన్టీఆర్ రాజకీయ జీవితాన్నే ఆధారంగా చేసుకుని వివాదాస్పద దర్శకుడు రామ్ గోపాల్ వర్మ ‘లక్ష్మీస్ ఎన్టీఆర్’ పేరిట మరో సినిమాను తెరకెక్కిస్తున్నారు. ఎన్టీఆర్ జీవితంలోకి లక్ష్మీపార్వతి అడుగుపెట్టిన తర్వాత జరిగిన పరిణామాలు, వెన్నుపోటు కాన్సెప్ట్‌ల ఆధారంగా ఈ సినిమాను వర్మ రూపొందిస్తున్నారు. ఈ సినిమాలో లక్ష్మీపార్వతి పాత్రను పాజిటివ్‌గా చూపించే ప్రయత్నం చేస్తున్నారు. ‘దగా దగా’ అంటూ వర్మ వదిలిన ‘వెన్నుపోటు’ పాట ఎంత పాపులర్ అయ్యిందో ప్రత్యేకంగా చెప్పాల్సిన అవసరంలేదు. ప్రస్తుతం తెలుగు ప్రేక్షకులు ‘లక్ష్మీస్ ఎన్టీఆర్’ కోసం ఆసక్తిగా ఎదురుచూస్తున్నారు.

ఇదిలా ఉంటే, ఎన్టీఆర్ జీవితంలో లక్ష్మీపార్వతి పాత్ర ఆధారంగానే ‘లక్ష్మీస్ వీరగ్రంథం’ అనే మరో సినిమాను దర్శక నిర్మాత కేతిరెడ్డి జగదీశ్వర రెడ్డి రూపొందిస్తున్నారు. ఈ చిత్రంలో లక్ష్మీపార్వతి పాత్రను వివాదాస్పద నటి శ్రీరెడ్డి పోషిస్తోంది. ఈ సినిమాలోని తొలిపాటను సోమవారం విడుదల చేశారు. ‘ద్రోహం విద్రోహం’ అంటూ సాగుతోన్న ఈ పాటలో లక్ష్మీపార్వతిని ద్రోహి, వంచకి, రాక్షసి అంటూ సంబోధించారు. ఈ పదాలను బట్టి చూస్తుంటే ఈ సినిమాలో లక్ష్మీపార్వతి పాత్రను పూర్తి నెగిటివ్‌గా చూపించబోతున్నట్లు అర్థమవుతోంది.

ఈ చిత్రాన్ని నాగరుషి ఫిలింస్ పతాకంపై విజయకుమార్ గౌడ్ సమర్పణలో కేతిరెడ్డి జగదీశ్వర రెడ్డి నిర్మిస్తూ దర్శకత్వం వహిస్తున్నారు. నాన్ సంగీతం సమకూర్చారు. సుధాకర్ రెడ్డి సినిమాటోగ్రఫీ అందించారు. ఎన్ని అవాంతరాలు ఎదురైనా మార్చి నెలాఖరుకి ఈ చిత్రాన్ని విడుదల చేసి తీరుతానని కేతిరెడ్డి చెబుతున్నారు. 

ద్రోహం విద్రోహం పాటలోని సాహిత్యం
ద్రోహం.. విద్రోహం..
నా కథ రాయడానికొచ్చి.. నా కథనే మార్చివేసి
కట్టుకున్న కోటనే కూల్చేసే ద్రోహం.. విద్రోహం
స్వార్థం.. నీ ప్రతి అడుగడుగు స్వార్థం
ద్వేషం.. నీ అణువణువు ద్వేషం
నా అనుకున్నవారినే నాకు దూరం చేసిన రాక్షసి
శిఖరాన్నంటిన నా ఖ్యాతిని నేలకు దించిన వంచకి.. వంచకి
జాతి నిన్ను క్షమించదు
భూమి నిన్ను భరించదు.. భరించదు