మహేశ్ మహర్షిపై పుల్వామా దెబ్బ
cinema | Suryaa Desk | Published : Tue, Feb 26, 2019, 06:19 AM
పుల్వామా ఉగ్రదాడిలో 40 మందికిపైగా భారత సైనికులు ప్రాణాలు కోల్పోయిన విషయం తెలిసిందే. ఉగ్రమూక జైషే మహ్మద్ మరిన్ని దాడులు చేసేందుకు ప్రయత్నాలు చేస్తున్నట్లు నిఘా వర్గాలు వెల్లడించడంతో దేశంలో భద్రతను కట్టుదిట్టం చేస్తున్నారు. రద్దీ ప్రాంతాలు, ఎయిర్ పోర్టులు, రైల్వే స్టేషన్లు, బస్టాండులు క్షుణ్ణంగా పరిశీలిస్తున్నారు. ఈ నేపథ్యంలో హైదరాబాద్ శంషాబాద్ విమానాశ్రయంలో జరగనున్న మహేశ్ బాబు సినిమా షూటింగ్కు ఆటంకం ఎదురైంది. దీంతో మహేశ్ బాబు ఎయిర్పోర్టు నుంచి వెళ్లిపోయారు. మహేశ్ బాబు హీరోగా వంశీ పైడిపల్లి దర్శకత్వంలో రూపొందతున్న చిత్రం ‘మహర్షి‘. ఈ సినిమా శంషాబాద్ ఎయిర్పోర్టులో షూటింగ్ చేసుకునేందుకు ‘మహర్షి’ చిత్ర బృందం అధికారుల నుంచి అన్ని అనుమతులు ముందుగానే తీసుకుంది. అయితే పుల్వామా దాడి తర్వాత భద్రతా సంబంధమైన సమస్యల కారణంగా, అధికారులు ఇచ్చిన అనుమతులను రద్దు చేశారు. ఉన్నతాధికారులతో సంప్రదింపులు జరిపినా ప్రయోజనం లేకపోయింది. దీంతో 5 గంటలపాటు క్యారవాన్లో వెయిట్ చేసిన మహేశ్ బాబు.. ఎయిర్ పోర్టు నుంచి ఇంటికి వెళ్లిపోయారు.
|
|