'గుంటూరు కారం' నుంచి కొత్త పోస్టర్ విడుదల
cinema | Suryaa Desk | Published : Wed, Dec 27, 2023, 02:24 PM
2024 సంక్రాంతికి 'గుంటూరు కారం' సినిమాతో ప్రేక్షకులను పలకరించనున్నాడు మహేష్ బాబు. ఇప్పటిదాకా ఈ సినిమా నుంచి విడుదలైన మెజారిటీ పోస్టర్లను గమనిస్తే, మహేష్ బీడీ తాగుతూ కనిపించాడు. దీంతో "ఈ బీడీ ఫాంటసీ ఏంటయ్యా నీకు" అంటూ అభిమానులు, ప్రేక్షకులను ఫన్నీ కామెంట్స్ చేశారు. అయితే ఇప్పుడు మహేష్ రూట్ మార్చాడు. బీడీ లేకుండానే కొత్త పోస్టర్ లో దర్శనమిచ్చాడు.
'గుంటూరు కారం' విడుదల తేదీ మారుతుందని, ఒకరోజు ముందుకి లేదా వెనక్కి వెళ్తుందని ప్రచారం జరిగింది. ఆ ప్రచారానికి చెక్ పెట్టేలా, జనవరి 12నే సినిమాని రిలీజ్ చేస్తున్నట్లు మరోసారి క్లారిటీ ఇస్తూ తాజాగా కొత్త పోస్టర్ ను వదిలారు మేకర్స్. ఆ పోస్టర్ లో గల్లచొక్కా, లుంగీ ధరించిన మహేష్ లుక్ ఆకట్టుకుంటోంది. చాలా కాలం తర్వాత మహేష్ నటిస్తున్న పూర్తిస్థాయి మాస్ సినిమా 'గుంటూరు కారం'. ఇప్పటిదాకా విడుదలైన పోస్టర్లన్నీ కూడా మాస్ గానే ఉన్నాయి. అయితే తాజా పోస్టర్ మాత్రం త్రివిక్రమ్ మార్క్ ఫ్యామిలీ ఎమోషన్స్ ఉంటాయనే భరోసాని కలిగిస్తోంది. పోస్టర్ లో మహేష్ తో శ్రీలీల, రఘుబాబు, ఈశ్వరీరావును గమనించవచ్చు.'అతడు', 'ఖలేజా' తర్వాత మహేష్, త్రివిక్రమ్ శ్రీనివాస్ కాంబినేషన్ లో రూపొందుతోన్న చిత్రమిది. హారిక & హాసిని క్రియేషన్స్ నిర్మిస్తున్న ఈ సినిమాలో శ్రీలీల, మీనాక్షి చౌదరి హీరోయిన్లుగా నటిస్తున్నారు. తమన్ ఈ చిత్రానికి సంగీతం అందిస్తున్నాడు.
|
|