మహిళ జీవన ప్రయాణాన్ని వివరించే చిత్రమే ‘మంగై’
cinema | Suryaa Desk | Published : Sat, Jan 06, 2024, 03:09 PM
జేఎస్ఎం పిక్చర్స్‌ పతాకంపై నిర్మాత ఏఆర్‌ జాఫర్‌ నిర్మాణ సారథ్యంలో కయల్‌ ఆనంది ప్రధాన పాత్రలో తెరకెక్కుతున్న చిత్రం ‘మంగై’. కుబేంద్రన్‌ కామాచ్చి దర్శకత్వం వహిస్తున్నారు. ఈ చిత్రం ఫస్ట్‌లుక్‌ను ప్రముఖ దర్శకులు వెట్రిమారన్‌, అమీర్‌, నటుడు విజయ్‌ సేతుపతి కొత్త సంవత్సరం సందర్భంగా విడుదల చేశారు. అమీర్‌ ప్రధాన పాత్రలో ఏఆర్‌ జాఫర్‌ ‘ఇరైవన్‌ మిగ పెరియవన్‌’ అనే పేరుతో చిత్రాన్ని తెరకెక్కిస్తున్న విషయం తెల్సిందే. ఇపుడు, హీరోయిన్‌ ప్రధాన పాత్రలో ‘మంగై’ పేరుతో ఈ చిత్రాన్ని రూపొందిస్తున్నారు. ఈ చిత్రం గురించి దర్శకుడు మాట్లాడుతూ... ‘‘ఇది ఒక మహిళ జీవన ప్రయాణాన్ని వివరించే చిత్రం. మున్నార్‌, పూంపారై, కేరళ, తేని, కంభం, గూడలూరు, లోయర్‌ క్యాంపు, చెన్నై తదితర ప్రాంతాల్లో చిత్రీకరించాం. ఆనంది ఈ చిత్రంతో మరోసారి తన నటనాపటిమను చాటనున్నారు. ఆమె పాత్రే ఈ చిత్రానికి కీలకం. శశికుమార్‌ నటించిన ‘ఈసన్‌’ సినిమాలో కీలక పాత్రను పోషించిన దుషి ఇందులో ఓ ముఖ్యపాత్రను పోషించారు. నిర్మాణాంతర కార్యక్రమాలను పూర్తి చేసి, ఫిబ్రవరిలో ఆడియో, ట్రైలర్‌ను రిలీజ్‌ చేసి, మార్చి నెలలో విడుదల చేసేలా ప్లాన్‌ చేస్తున్నాం’’ అని వివరించారు.
|
|