మోడీ అక్క‌డ సూప‌ర్ హిట్‌... ఇక్క‌డ అట్ట‌ర్ ఫ్లాప్‌

ఈ మ‌ధ్య పార్లమెంటు ఎన్నికల్లో వెలువ‌డిన ఫ‌లితాలు ప్ర‌ధాని నరేంద్ర మోడీ  సాధించిన భారీ విజయం ఆత‌ని కీర్తి ప్ర‌తిష్ట‌ల‌ని మ‌రింత పెంచింది.  2014 ఎన్నికలలో గెలుపు ఉత్సాహాన్ని మ‌రింత దూకుడుగా ఐదేళ్ల పాల‌న‌లో కొన‌సాగించి  అసాధారణ  విజయాన్నందుకున్నాడు కానీ..

 ఆయన బ‌యోపిక్ మాత్రం సినిమా ఇండస్ట్రీలో అతి పెద్ద‌ డిజాస్టర్ గా మిగిలిపోవ‌టం విడ్డూర‌మే.   మోడీ జీవిత కథ ఆధారంగా  తెరకెక్కిన ‘పీఎం నరేంద్ర మోడీ’  ఎన్నికల కంటే ముందే విడుదల చేసేందుకు నానా ప్రయ‌త్నాలు చేసారు క‌మ‌ల‌నాధులు అయితే ఈ చిత్రం విడుద‌ల‌పై వ‌చ్చిన అభ్యంత‌రాల‌ను దృష్టిలో ఉంచుకుని  ఎన్నికల సంఘం, చివ‌రికి కోర్టు కూడా నిలిపివేత ఆదేశాలివ్వ‌టంతో  వాయిదా పడిన విష‌యం విదిత‌మే. 

 అనేక అవాంత‌రాల‌ను దాటుకుని ఎట్ట‌కేల‌కు ఈ చిత్రం గత వారం  ధియేట‌ర్ల‌లోకి  వచ్చింది.  బాలీవుడ్‌లో పెద్ద‌ దర్శకుల‌లో ఒక‌రైన ఒమంగ్ కుమార్  డైరెక్ష‌న్‌లో వివేక్ ఒబెరాయ్   హీరోగా న‌టించిన ఈ చిత్రాన్ని అంతా చూడాలంటూ క‌మ‌ల‌నాధులు తెగ ప్ర‌చారం చేసినా  వసూళ్లు విష‌యంలో చ‌తికిల్ల ప‌డింది. తొలి వారంలో ఈ చిత్రం దేశవ్యాప్తంగా రూ.16 కోట్ల గ్రాస్ మాత్రమే కలెక్ట్ చేసింది. ఐతే మోడీ కోసం పోలింగ్ కేంద్రానికి వెళ్లి ఓట్లు వేసాం కానీ.. ఆయన సినిమా చూడటానికి థియేటర్లకు మాత్రం వెళ్లమని ప్రేక్షకులు చెపుతున్నార‌నేందుకు క‌లెక్ష‌న్లే ఓ పెద్ద ఉదాహ‌ర‌ణ‌.

ఈ సినిమా  కేవలం మోడీ భజన చేయడానికి తీసిన‌ట్టుంద‌ని, దేశ రాజకీయ చరిత్రలోనే మోడీ అంత‌ గొప్ప నాయకుడు మరొకరు లేర‌ని చెప్ప‌డ‌మే ఈ సినిమా ఉద్దేశంగా క‌నిపించిందన్న‌ది విశ్లేష‌కుల మాట‌. పైగా  ఈ చిత్రానికి విమర్శకులంతా ఇచ్చిన‌ రేటింగ్స్ చూస్తే మ‌రీఘోరం. చివ‌ర‌కి వీరంతా ఇదో  చెత్త సినిమాగా పేర్కొన్నారంటే ఎలా ఉందో అర్ధం చేసుకోవ‌చ్చు.  ఏమైనా రాజ‌కీయాల‌లో సూప‌ర్ హిట్లు కొట్టిన మోడీ సినిమా అతి పెద్ద‌ డిజాస్టర్ గా మిగిలిపోవ‌టం విడ్డూర‌మే  అని చెప్ప‌క త‌ప్ప‌దు.