ఆస్కార్‌కు అడుగు దూరంలో ‘అనుజా’

బాలకార్మికులుగా మారిన పిల్లల బతుకు పోరాటాలను కళ్లకు కట్టినట్లు చూపించిన లఘు చిత్రమే ‘అనుజా’. నిరుపేద కుటుంబానికి చెందిన తొమ్మిదేళ్ల బాలిక అనుజా. బోర్డింగ్‌ స్కూల్లో చేరి బాగా చదువుకోవాలని తపించినా.. ఆర్థిక స్థోమత లేకపోవడంతో తన అక్కతో కలిసి ఓ దుస్తుల ఫ్యాక్టరీలో పనిచేస్తుంటుంది. తన అక్క ద్వారానే చదువుకు సంబంధించిన పలు  విషయాలు తెలుసుకున్న తర్వాత ఆమెకు చదువుకోవాలనే ఆసక్తి మరింత పెరుగుతుంది. రెక్కాడితే కానీ డొక్కాడని పరిస్థితుల్లో అనుకోకుండా అనుజకి బోర్డింగ్‌ స్కూల్లో చదువుకునే అవకాశం వస్తుంది.మరి ఆమె తన కలను నెరవేర్చుకోవడానికి పాఠశాలలో చేరిందా? చిన్న వయసులోనే తన కుటుంబ ఆర్థిక స్థితిగతుల గురించి పూర్తిగా తెలిసి వెనకడుగు వేసిందా? ఈ కఠిన పరిస్థితుల్లో అనుజా తన భవిష్యత్తు కోసం ఎలాంటి నిర్ణయం తీసుకుంది? దానికి తోడ్పడిన వ్యక్తులెవరు? అనేదే ఈ సినిమా కథాంశం. బాలకార్మికుల జీవితాల్లోని ఓ తెలియని కోణాన్ని ఆవిష్కరించిన ఈ సినిమాను గునీత్‌ మోంగా, సుచిత్రా మిట్టల్, మిండీ కాలింగ్‌ తదితరులు నిర్మించారు. దీనికి బాలీవుడ్‌ నాయిక ప్రియాంక చోప్రా ఎగ్జిక్యూటివ్‌ ప్రొడ్యూసర్‌గా వ్యవహరించడం మరో ప్రధాన ఆకర్షణ. 

1988లో ఓ సామాజిక సమస్య ఆధారంగా తెరకెక్కిన ‘సలామ్‌ బాంబే’కు వచ్చిన ఆదాయంతో ఈ సలామ్‌ బాలక్‌ ట్రస్ట్‌ను ఏర్పాటు చేశారు. ఈ స్వచ్చంద సంస్థను నటి, దర్శక నిర్మాత మీరా నాయర్‌ స్థాపించారు. బాలకార్మికులుగా జీవితాన్ని వెళ్లదీస్తున్న ఎంతో మంది పిల్లలకు ఆ చాకిరీ నుంచి విముక్తి కలిగిస్తున్న ఈ ట్రస్ట్‌ ‘అనుజా’ చిత్ర నిర్మాణం, నటీనటుల ఎంపిక ప్రక్రియలో కీలక పాత్ర పోషించింది. ఇప్పటికే రెండు సార్లు మన దేశం తరఫున ఆస్కార్‌ వేదికపై నిలిచి శెభాష్‌ అనిపించుకున్నారు బాలీవుడ్‌ నిర్మాత గునీత్‌ మోంగా. ఇప్పుడు ‘అనుజా’ చిత్రంతో మళ్లీ ఆ వేదికపైకి అడుగుపెట్టడానికి సిద్ధమయ్యారు. ఇప్పటికే ఎన్నో సినిమాలకు నిర్మాతగా వ్యవహరించి అంతర్జాతీయ స్థాయిలో ప్రశంసలు అందుకున్నారామె. సినిమాకు నిర్మాతగా ఉండటమంటే తల్లిదండ్రుల బాధ్యత తీసుకున్నట్లే అని చెప్పుకొచ్చే గునీత్‌.. ‘పీరియడ్‌ ఎండ్‌ ఆఫ్‌ సెంటెన్స్‌’ అనే చిత్రానికి 2019లో తొలిసారి అకాడెమీ అవార్డును దక్కించుకున్నారు. 2023లో ‘ది ఎలిఫెంట్‌ విస్పరర్స్‌’ అనే లఘు చిత్రానికి గానూ రెండోసారి ఆస్కార్‌ వేదికపై సగర్వంగా నిలిచారు గునీత్‌. మరి 97వ అకాడెమీ పురస్కారాల్లో గెలిచి ఆస్కార్‌ హ్యాట్రిక్‌ కొడతారో లేదో చూడాలి.