ఈ నెల 7న విడుదల కానున్న తండేల్‌

‘మత్సలేశ్యం అనే ఊరుని బేస్‌ చేసుకుని తయారు చేసిన కథ ఇది. అక్కడి వారు గుజరాత్‌ పోర్ట్‌కి ఫిషింగ్‌కు వెళతారు. అక్కడ బోటు ఉన్న వారికి బిరుదులు ఉంటాయి. మొయిన్‌ లీడర్‌ని తండేల్‌ అంటారు. అది గుజరాతీ పదం. ఇది ప్యూర్‌ లవ్‌ స్టోరీ. అలాగే గూస్‌ బంప్స్‌ మూమెంట్స్‌ చాలా ఉంటాయి. సినిమా తప్పకుండా పెద్ద హిట్‌ అవుతుంది’ అని చెప్పారు నిర్మాత బన్నీ వాసు. నాగచైతన్య, సాయి పల్లవి జంటగా చందు మొండేటి దర్శకత్వంలో రూపొందిన ‘తండేల్‌’ చిత్రం ఈ నెల 7న విడుదలవుతోంది. ఈ సందర్భంగా బన్నీ వాసు మీడియాతో ముచ్చటిస్తూ చెప్పిన విషయాలవి.రచయిత కార్తీక్‌ది మత్సలేశ్యం పక్క ఊరు. అక్కడి సంఘటనల నుంచి స్పూర్తి పొంది ఈ చిత్రకథ తయారు చేశారు. నాకు బాగా నచ్చింది. కథను డెవలప్‌ చేస్తూ చాలా రీసెర్చ్‌ చేశాం. కొంతమందిని కలిసినప్పుడు వారు చెప్పిన కొన్ని విషయాలు గూస్‌ బంప్స్‌ తీసుకొచ్చాయి. ఆ విషయాలన్నీ చెప్పడానికి రాజు, సత్య అనే ఫిక్షనల్‌ క్యారెక్టర్స్‌ను దర్శకుడు చందు డిజైన్‌ చేశారు.రాజు, సత్యల ప్రేమకథ ఇది. ఆ లవ్‌స్టోరీ ద్వారా ఒరిజినల్‌గా జరిగిన కథను చూపించాం. ఇందులో యాభై శాతం ఫిక్షన్‌ ఉంటుంది. నాగచైతన్యకు ఈ చిత్రకథ బాగా నచ్చింది. ఇందులో చేపలు పట్టే వాడి పాత్రలో పరకాయ ప్రవేశం చేయడానికి ఆయన తీసుకున్న శ్రద్ధ అద్భుతం. యాస మీద కూడా వర్కవుట్‌ చేశారు. అలాగే సాయిపల్లవి కూడా చైతుకి మ్యాచ్‌ అయ్యేలా నటించారు. శివుడి పాటలో వాళ్లిద్దరు చేసిన నృత్యం థియేటర్స్‌లో పూనకాలు తెప్పిస్తుంది.సినిమా తెలుగు, తమిళ, హిందీ భాషల్లో విడుదలవుతోంది. అరవింద్‌గారు సినిమాను చూడడంతో చాలా కాన్ఫిడెంట్‌గా ఉన్నారు. మాకు ఇంత లైఫ్‌ ఇచ్చిన ఆయన అంత ఎంజాయ్‌ చేస్తుంటే చూడముచ్చటగా ఉంది.