నేను చిరంజీవిని తండ్రిలా భావిస్తా: డిప్యూటి సీఎం పవన్ కళ్యాణ్

తన అన్నయ్య మెగాస్టార్ చిరంజీవికి యూకే పార్లమెంట్ లైఫ్‌టైమ్ అచీవ్‌మెంట్ అవార్డు రావడంపై ఏపీ డిప్యూటీ సీఎం పవన్ కళ్యాణ్ ఆనందం వ్యక్తం చేశారు. అన్నయ్య మెగాస్టార్ చిరంజీవిపై జనసేన అధినేత, డిప్యూటీ సీఎం పవన్ కల్యాణ్ ప్రశంసల జల్లు కురిపించారు.సాధారణ మధ్యతరగతి ఎక్సైజ్ కానిస్టేబుల్ కొడుకుగా జీవితం మొదలుపెట్టి, స్వశక్తితో, కళామతల్లి దీవెనలతో, చిత్ర రంగంలో మెగాస్టార్‌గా ఎదిగారని కొనియాడారు. నాలుగున్నర దశాబ్దాలుగా ప్రపంచవ్యాప్తంగా అభిమానులను అలరిస్తూ, తన నటనతో ఉత్తమ నటుడిగా 9 ఫిలింఫేర్ అవార్డులు, 3 నంది అవార్డులు అందుకుని, నటనకు పర్యాయపదంగా నిలిచిన వ్యక్తి మెగాస్టార్ చిరంజీవి అని ప్రశంసించారు. మెగాస్టార్ చిరంజీవికి తమ్ముడిగా పుట్టినందుకు ఎప్పుడూ గర్విస్తూనే ఉంటాను అని అన్నారు. తాను చిరంజీవిని ఒక అన్నయ్య గా కంటే ఒక తండ్రి సమానుడిగా భావిస్తాను. నేను జీవితంలో ఏం చేయాలో తెలియక, అయోమయంలో ఉన్న పరిస్థితుల్లో నాకు మార్గం చూపించిన వ్యక్తి మెగాస్టార్ చిరంజీవి అని కొనియాడారు. నా జీవితానికి హీరో అన్నయ్య చిరంజీవి అని డిప్యూటీ సీఎం పవన్ కల్యాణ్ కొనియాడారు.

ఎంతో మందికి స్ఫూర్తి ప్రదాత చిరంజీవి

మెగాస్టార్ చిరంజీవి తన సేవా భావంతో చిరంజీవి చారిటబుల్ ట్రస్ట్ స్థాపించడం ద్వారా ఆపదలో ఉన్నవారికి రక్తదానం, నేత్రదానం అందిస్తున్నారని డిప్యూటీ సీఎం పవన్ కల్యాణ్ తెలిపారు .తననే కాకుండా కోట్లాదిమంది అభిమానులను సమాజ సేవకులుగా మార్చిన స్ఫూర్తి ప్రదాత తన సోదరుడు మెగాస్టార్ చిరంజీవి అని ప్రశంసించారు. తాను ఎదగడమే కాకుండా తన కుటుంబంతో పాటుగా, ఎంతోమంది ఎదుగుదలకు ప్రత్యక్షంగాను పరోక్షంగాను సహాయ సహకారాలు అందిస్తూ, టాలెంట్ ఉన్న ఎవరైనా సరే ఏ రంగంలో అయినా సరే రాణించవచ్చు అనేందుకు ఉదాహరణగా నిలిచారు. ఆయన సమాజానికి అందించిన సేవలకు గాను ఇటీవలే భారత ప్రభుత్వం రెండవ అత్యున్నత పౌర పురస్కారం పద్మ విభూషణ్ పురస్కారాన్ని రాష్ట్రపతి ద్రౌపదీ ముర్మూ చేతుల మీదుగా అందుకున్నారు అని డిప్యూటీ సీఎం పవన్ కల్యాణ్ గుర్తుచేశారు.