విభిన్న గెటప్స్‌లో సూర్య

గజిని, సింగం వంటి చిత్రాలు తమిళ హీరో సూర్యకు తెలుగులో కూడా ఎనలేని గుర్తింపును తెచ్చి పెట్టాయి. దాంతో ఆయన నటించిన చిత్రాలకు తెలుగులో కూడా మంచి ఓపనింగ్స్‌ వస్తున్నాయి. తాజాగా తమిళంలో రూపొందుతున్న కప్పాన్‌ అనే చిత్రం తెలుగులో బందోబస్త్‌ పేరుతో విడుదల కానుంది. కె.వి.ఆనంద్‌ దర్శకుడు. సూర్య, కె.వి.ఆనంద్‌ల కలయికలో రూపుదిద్దుకుంటున్న మూడవ చిత్రమిది. లోగడ నవాబ్‌, 2.0. వంటి సినిమాలను అందించిన లైకా ప్రొడక్షన్స్‌ దీనిని నిర్మిస్తోంది. సుభాస్కరణ్‌ నిర్మాత. కాగా ఈ చిత్రం తమిళ వెర్షన్‌ పాటలు ఇటీవలే సూపర్‌స్టార్‌ రజనీకాంత్‌ చేతుల మీదుగా విడుదలయ్యాయి. హేరీస్‌ జైరాజ్‌ స్వరపరిచిన పాటలు అక్కడి శ్రోతలను చాలాబాగా అలరిస్తున్నాయని, త్వరలో తెలుగు వెర్షన్‌ పాటల్ని విడుదల చేయడానికి సన్నాహాలు చేస్తున్నామని చిత్రబృందం తెలిపింది.

సోనీ మ్యూజిక్‌ ద్వారా ఆడియో విడుదల కానున్నట్లు వారు చెప్పారు. ఇప్పటికే విడుదలైన తెలుగు టీజర్‌ ఎంతో అలరించిందని, విభిన్న గెటప్స్‌లో సూర్య నటన, పాకిస్తాన్‌ తీరును ఎండగడుతూ మోహన్‌లాల్‌ చెప్పిన పవర్‌ఫుల్‌ డైలాగ్స్‌ ఆకట్టుకున్నాయని తెలిపారు. ఈ చిత్రంలో భారత ప్రధానిగా మోహన్‌లాల్‌, కీలక పాత్రలో ఆర్య నటించారని, సెప్టెంబర్‌ 20న ఈ సినిమాను విడుదల చేయనున్నట్లు సంస్థ ప్రతినిధులు వెల్లడించారు. ఈ చిత్రంలో సూర్య సరసన సాయేషా సైగల్‌ నటించగా…ఇతర ముఖ్య పాత్రల్లో బొమన్‌ ఇరాని, సముద్రఖని, పూర్ణ, నాగినీడు తదితరులు తారాగణం. ఈ చిత్రానికి రచన పి.కె.పి. అండ్‌ శ్రీరామకృష్ణ, పాటలు: వనమాలి, చంద్రబోస్‌, సినిమాటోగ్రఫీ: ఎం.ఎస్‌.. ప్రభు, సంగీతం: హేరీస్‌ జైరాజ్‌, కళ: డి.ఆర్‌.కె. కిరణ్‌, ఎడిటింగ్‌: ఆంటోని, స్టంట్స్‌: దిలీప్‌ సుబ్బరాయన్‌, పీటర్‌ హెయిన్స్‌.