ప్రముఖ కొరియోగ్రాఫర్, నటుడు, దర్శకుడిగా పేరుపొందిన రాఘవ లారెన్స్ మరోసారి తన మంచి మనసును చాటుకున్నారు

ప్రముఖ కొరియోగ్రాఫర్, నటుడు, దర్శకుడిగా పేరుపొందిన రాఘవ లారెన్స్ మరోసారి తన మంచి మనసును చాటుకున్నారు. కష్టపడి కూడబెట్టుకున్న సొమ్మును చెదలు పాడుచేయడంతో తీవ్ర ఆవేదనకు గురైన ఓ నిరుపేద కుటుంబానికి ఆయన ఆర్థికంగా అండగా నిలిచారు. వివరాల్లోకి వెళితే, తమిళనాడులోని శివగంగై జిల్లా, తిరుప్పువనం గ్రామానికి చెందిన కుమార్ మరియు అతని భార్య ముత్తుకరుప్పి (30) దినసరి కూలీలుగా జీవనం సాగిస్తున్నారు. వారికి ముగ్గురు సంతానం.తమ పిల్లల చెవిపోగుల కార్యక్రమం నిర్వహించడం కోసం ఈ దంపతులు కొన్నాళ్లుగా కూలి డబ్బులను జాగ్రత్తగా ఒక హుండీలో పొదుపు చేసుకుంటున్నారు. అలా జమ అయిన నగదును భద్రంగా ఉంటుందని భావించి, ఇంటి ఆవరణలోనే ఒక గొయ్యి తవ్వి అందులో హుండీని దాచిపెట్టారు. కొన్ని నెలల క్రితం అవసరం నిమిత్తం హుండీని వెలికితీసి చూడగా, అందులో సుమారు లక్ష రూపాయల వరకు నగదు ఉన్నట్లు గుర్తించారు. మరికొంత కాలం పొదుపు చేసి, వేడుక ఘనంగా నిర్వహించాలని తలచి, తిరిగి హుండీని యధావిధిగా పాతిపెట్టారు.అయితే, ఇటీవల పిల్లల వేడుక సమీపిస్తుండటంతో హుండీని బయటకు తీసిన ఆ కుటుంబం తీవ్ర దిగ్భ్రాంతికి గురైంది. హుండీ లోపలికి చెదలు ప్రవేశించి, అందులోని ఐదు వందల రూపాయల నోట్లను చాలా వరకు తినేశాయి. తాము ఎంతో కష్టపడి, పిల్లల భవిష్యత్తు కోసం దాచుకున్న డబ్బు ఈ విధంగా పాడుకావడంతో ఆ కుటుంబ సభ్యులు కన్నీరుమున్నీరుగా విలపించారు.ఈ హృదయ విదారక ఘటన స్థానిక పత్రికలు, సామాజిక మాధ్యమాల ద్వారా వెలుగులోకి వచ్చింది. ఈ వార్త రాఘవ లారెన్స్ దృష్టికి చేరడంతో ఆయన తక్షణమే స్పందించారు. ఆ కుటుంబం కోల్పోయిన లక్ష రూపాయల మొత్తాన్ని వారికి అందజేసి, వారి కష్టాల్లో పాలుపంచుకున్నారు. ఈ సందర్భంగా లారెన్స్ తన ఎక్స్  ఖాతా ద్వారా స్పందిస్తూ, "కూలి పని చేసుకుని జీవించే కుటుంబం ఎంతో కష్టపడి సంపాదించుకున్న డబ్బు చెదలు తినేశాయన్న వార్త నన్ను తీవ్రంగా కలచివేసింది. వారి ఆవేదన నా హృదయాన్ని ద్రవింపజేసింది. వారు నష్టపోయిన మొత్తాన్ని తిరిగి అందించడం నాకు ఎంతో సంతోషాన్నిచ్చింది. ఈ విషయాన్ని నా దృష్టికి తీసుకువచ్చిన మీడియా మిత్రులకు, ప్రజలకు నా హృదయపూర్వక ధన్యవాదాలు" అని పేర్కొన్నారు. లారెన్స్ చూపిన ఈ చొరవ పట్ల పలువురు ప్రశంసలు కురిపిస్తున్నారు.