విడాకులు, భరణంపై సల్మాన్ చేసిన వ్యాఖ్యలు వైరల్

కపిల్ శర్మ తన బృందంతో కలిసి 'ది గ్రేట్ ఇండియన్ కపిల్ షో' సరికొత్త సీజన్‌తో ప్రేక్షకులను అలరించడానికి సిద్ధమయ్యారు. ఈ సీజన్‌లో నవజ్యోత్ సింగ్ సిద్ధూ ఈ షోకు శాశ్వత అతిథిగా తిరిగి రావడం విశేషం. ఈ కార్యక్రమానికి మొదటి అతిథిగా బాలీవుడ్ కండల వీరుడు సల్మాన్ ఖాన్ హాజరవుతున్నట్లు గతంలోనే సిద్ధూ వెల్లడించారు. తాజాగా, సల్మాన్ ఖాన్ షోలో పాల్గొన్న ఒక వీడియో క్లిప్ ఆన్‌లైన్‌లో ప్రత్యక్షమై అభిమానుల్లో తీవ్ర ఆసక్తిని రేపుతోంది.ఈ వీడియోలో, సల్మాన్ ఖాన్ తన 'బీయింగ్ హ్యూమన్' టీషర్ట్‌లో కనిపించారు. విడాకులు, భరణం వంటి విషయాలపై ఆయన తన అభిప్రాయాలను పంచుకున్నారు. "గతంలో ప్రజలు ఒకరి కోసం ఒకరు త్యాగాలు చేసుకునేవారు, సహనం అనేది ఉండేది. ఇప్పుడు రాత్రిళ్లు ఒకరి కాలు మరొకరి మీద పడిందనో, గురక పెడుతున్నారనో విడాకులు తీసుకుంటున్నారు. చిన్న చిన్న అపార్థాలకే విడిపోతున్నారు. అంతేకాదు, విడాకుల తర్వాత ఆమె సగం డబ్బులు కూడా తీసుకెళ్లిపోతోంది" అని సల్మాన్ వ్యాఖ్యానించారు.సల్మాన్ చేసిన ఈ వ్యాఖ్యలకు ప్రేక్షకులు మాత్రమే కాకుండా, షోలో ఉన్న అర్చనా పూరన్ సింగ్, కపిల్ శర్మ, నవజ్యోత్ సింగ్ సిద్ధూ కూడా పగలబడి నవ్వారు. ఈ క్లిప్ సోషల్ మీడియాలో వైరల్ అయింది. సల్మాన్ చెప్పిన మాటలతో చాలా మంది అభిమానులు ఏకీభవించారు. "ఆయన తన కెరీర్ ప్రారంభం నుంచే చాలా స్పష్టమైన ఆలోచనలతో ఉన్నారు, కానీ ఎప్పుడూ మేధావిలా నటించలేదు" అని ఒకరు వ్యాఖ్యానించగా, "మెగాస్టార్ సల్మాన్ ఖాన్ నిజాలు మాట్లాడుతున్నారు. మేము మిమ్మల్ని ప్రేమిస్తున్నాం సల్మాన్ ఖాన్" అని మరొకరు రాశారు. "ఆయన 100 శాతం నిజాలు చెబుతున్నారు" అని ఇంకొకరు పేర్కొన్నారు.