by Suryaa Desk | Sat, Nov 23, 2024, 10:39 PM

హెయిర్ డ్రయర్ పేలి ఓ మహిళ చేతులు చిధ్రమైన ఘటన సంచలనం సృష్టించిన సంగతి తెలిసిందే. కర్ణాటకలో చోటు చేసుకున్న ఈ ఘటనలో షాకింగ్ విషయాలు వెలుగులోకి వచ్చాయి. ఈ ఘటన అనుకోకుండా జరగిందని అంతా అనుకున్నారు. కానీ, దీని వెనుక ఓ పెద్ద క్రైమ్ లవ్ స్టోరీయే ఉంది. ఇదంతా ఓ వ్యక్తి కావాలనే చేశాడనే విషయాలు వెలుగులోకి వచ్చాయి. ఇదంతా చేసింది ఎవరు? ఎందుకు చేశారు? ఆ వివరాలు..

బాగల్‌కోటె జిల్లా ఇల్కాల్ పట్టణానికి చెందిన శశికళ అనే మహిళకు నవంబర్ 15న ఓ కొరియర్ వచ్చింది. అయితే, ఆ సమయంలో ఆమె ఇంట్లో లేకపోవడంతో పక్కింట్లో ఉన్న బసవరాజేశ్వరికి ఆ కొరియర్ తీసుకోవాలని ఫోన్ చేసి చెప్పింది. అలా ఆ పార్శిల్ అందుకున్న బసవరాజేశ్వరి దాన్ని విప్పి చూడగా.. అందులో హెయిర్ డ్రయర్ కనిపించింది. అదే విషయాన్ని శశికళకు చెప్పగా తాను దాన్ని ఆర్డర్ చేయలేదని చెప్పింది. అంతటితో ఆగకుండా దాన్ని ఓసారి పరీక్షించమని కోరింది. దీంతో బసవరాజేశ్వరి ప్లగ్ పెట్టి స్విచ్ఛాన్ చేసింది. వెంటనే అది బాంబులా పేలడంతో ఆమె రెండు చేతులు చిధ్రమైపోయాయి.

తీవ్రంగా గాయపడిన బసవరాజేశ్వరిని ఇరుగుపొరుగు వారు ఆస్పత్రికి తరలించారు. ఘటనపై పోలీసులకు సమాచారం అందించారు. శశికళ ఆర్డర్ చేయకపోయినా హెయిర్ డ్రయర్ ఎక్కడి నుంచి వచ్చిందని తెలుసుకునే ప్రయత్నం చేశారు పోలీసులు. తొలుత ఈ ప్రమాదం షార్ట్ సర్క్యూట్ కారణంగా జరిగిందని అనుకున్నా.. అసలు నిజం ఆలస్యంగా వెలుగులోకి వచ్చింది. కేసు దర్యాప్తులో భాగంగా పోలీసులు అసలు నిందితుడు సిద్ధప్ప శీలవంత్ అని తేల్చారు. శీలవంత్ ఆ మహిళను ఎందుకు చంపాలనుకున్నాడు..?

బసవరాజేశ్వరి భర్త పాపన్న యర్నాల్ ఆర్మీ జవాన్‌గా పనిచేసేవారు. 2017లో జమ్మూ కాశ్మీర్‌లో పనిచేస్తుండగా విద్యుత్ షార్ట్ సర్క్యూట్ కారణంగా కరెంట్ షాక్‌తో ఆయన మృతి చెందారు. ఆ తర్వాత కొప్పల్‌ పరిధిలోని కుర్తరేగి గ్రామానికి చెందిన 35 ఏళ్ల శీలవంత్‌తో బసవ రాజేశ్వరికి పరిచయం ఏర్పడింది. ఆ పరిచయం కాస్త వివాహేతర సంబంధానికి దారి తీసింది. అయితే, కొన్ని రోజుల కిందట నుంచి బసవ రాజేశ్వరి శీలవంత్‌ను దూరం పెడుతూ వస్తోంది. అతడితో మాట్లాడటం మానేసింది. తన ప్రియురాలు తనతో మాట్లాడకపోవడానికి కారణం శశికళేనని భావించి శీలవంత్ ఆమెపై కోపం పెంచుకున్నాడు.

బసవరాజేశ్వరి పొరుగింట్లో నివాసం ఉంటున్న శశికళతో కొన్ని నెలల కిందట ఆమెకు పరిచయం ఏర్పడింది. వారిద్దరూ మంచి స్నేహితులయ్యారు. నాటి నుంచి బసవరాజేశ్వరి తనతో మాట్లాడడం లేదని శీలవంత్ భావించాడు. తన ప్రేయసిని తనకు దూరం చేసిన శశికళను చంపేయాలని నిర్ణయం తీసుకున్నాడు. అందుకోసం ప్రణాళిక రచించాడు.

గ్రానైట్ కంపెనీలో పని చేస్తున్న శీలవంత్‌కు డిటోనేటర్లపై అవగాహన ఉంది. దీంతో తెలిసిన విద్యతోనే శశికళను చంపేందుకు స్కెచ్ వేశాడు. హెయిర్ డ్రయర్‌ను కొనుగోలు చేసి అందులో డిటోనేటర్ అమర్చాడు. హెయిర్ డ్రయర్ స్విచ్ఛాన్ చేయగానే పేలేలా సెట్ చేశాడు. ఆ తర్వాత దాన్ని శశికళ పేరుతో ఆమె ఇంటికి పార్శిల్ చేశాడు.

సరిగ్గా ఆ పార్శిల్ ఇంటికొచ్చిన సమయంలో శశికళ ఇంట్లో లేకపోవడం.. దాన్ని తన ప్రియురాలు బసవరాజేశ్వరే తీసుకోవడంతో ఈ క్రైమ కథాచిత్రం ఊహించని మలుపు తిరిగింది. శీలవంత్ ప్రియురాలే ప్రమాదానికి గురైంది. పోలీసులు శీలవంత్‌ను అరెస్టు చేసి విచారించగా.. తన నేరాన్ని అంగీకరించాడు. అతడిపై హత్యానేరం కింద కేసు నమోదు చేశారు.