by Suryaa Desk | Sat, Nov 23, 2024, 10:40 PM

మహారాష్ట్ర అసెంబ్లీ ఎన్నికల్లో ఎగ్జిట్ పోల్స్ అంచనా వేసినట్లుగానే ప్రస్తుతం అధికారంలో ఉన్న బీజేపీ-షిండే శివసేన-అజిత్ పవార్ ఎన్సీపీ నేతృత్వంలోని మహాయుతి కూటమి.. తిరుగులేని విజయాన్ని నమోదు చేసింది. ఈ క్రమంలోనే కాంగ్రెస్-ఉద్ధవ్ శివసేన-శరద్ పవార్ ఎన్సీపీ నేతృత్వంలోని మహా వికాస్ ఆఘాడీ ఘోర పరాభవాన్ని మూటగట్టుకుంది. ఈ నేపథ్యంలోనే తాజాగా మరో ఘటన మహారాష్ట్ర అసెంబ్లీ ఎన్నికల ఫలితాల్లో వెల్లడైంది. నటుడు, బిగ్‌బాస్ ఫేమ్ అజాజ్ ఖాన్.. ఈ ఎన్నికల్లో ఘోర ఓటమి పాలయ్యాడు. అతడికి కేవలం 155 ఓట్లు మాత్రమే పోలవడం గమనార్హం.

ముంబైలోని వెర్సోవా నియోజకవర్గం నుంచి ఆజాద్ సమాజ్ పార్టీ తరఫున అజాజ్ ఖాన్ బరిలోకి దిగాడు. అయితే ఈ ఎన్నికల్లో అజాజ్ ఖాన్‌కు 155 ఓట్లు మాత్రమే పడ్డాయి. ఈ వెర్సోవా నియోజకవర్గంలో ఉద్ధవ్ ఠాక్రే శివసేన వర్గానికి చెందిన హరూన్‌ ఖాన్‌ గెలుపొందారు. హరూన్ ఖాన్ 65396 ఓట్లు సాధించి తన సమీప ప్రత్యర్థి బీజేపీకి చెందిన డాక్టర్ భారతి లవేకర్‌పై 1600 ఓట్ల తేడాతో విజయం సాధించారు. ఇక ఈ వెర్సోవా స్థానంలో నోటాకు 1298 ఓట్లు పడగా.. అజాజ్ ఖాన్‌కు మాత్రం 155 ఓట్లు పడటం అతడ్ని తీవ్రంగా కలిచివేసే అంశం.

ఇక అజాజ్‌ ఖాన్‌కు ఇన్‌స్టాగ్రామ్‌లో ఏకంగా 5.6 మిలియన్లు(56 లక్షల మంది) ఫాలోవర్లు ఉండడం గమనార్హం. సోషల్ మీడియాలోనే కాకుండా బయట కూడా ఆయనకు చాలా మంది అభిమానులు ఉన్నారు. ఇక మహారాష్ట్ర ఎన్నికల ఫలితాల వేళ.. అజాజ్ ఖాన్ ఫలితాల కోసం సోషల్ మీడియాలో ఆయన ఫాలోవర్స్ ఆసక్తిగా ఎదురు చూశారు. అజాజ్‌ ఖాన్‌.. ఎన్నో హిందీ చిత్రాల్లో నటించాడు. లకీర్‌ కా ఫఖీర్‌, అల్లా కీ బండే, హై తుజే సలాం వంటి చిత్రాల్లో అజాజ్ ఖాన్‌కు మంచి పేరు వచ్చింది. ఇక టాలీవుడ్‌లోనూ రక్తచరిత్ర, దూకుడు, బాద్‌షా, నాయక్‌, హార్ట్‌ ఎటాక్‌ వంటి సినిమాల్లో అజాజ్ ఖాన్ విలన్‌గా నటించాడు. ఇక బుల్లితెరపైనా పలు సీరియల్స్‌లో అజాజ్ ఖాన్ యాక్టింగ్ చేశాడు. హిందీ బిగ్‌బాస్‌ 7, 8వ సీజన్స్‌లో పాల్గొన్నాడు. ఇక సోషల్ మీడియాలో అభ్యంతరకరమైన పోస్టులు, వివాదాస్పద వ్యాఖ్యలు, డ్రగ్స్‌ వల్ల అజాజ్ ఖాన్ 4 సార్లు జైలుకు కూడా వెళ్లి రావడం గమనార్హం.