by Suryaa Desk | Tue, Dec 24, 2024, 06:36 PM

ఆంధ్రప్రదేశ్ రాష్ట్రానికి కేంద్ర ప్రభుత్వం నిధులు విడుదల చేసింది. కేంద్ర ప్రభుత్వం మంగళవారం పలు రాష్ట్రాలకు 15వ ఆర్థిక సంఘం నిధులు విడుదల చేసింది. 2024-25 ఆర్థిక సంవత్సరానికి సంబంధించి ఆంధ్రప్రదేశ్, ఉత్తరప్రదేశ్ రాష్ట్రాల్లోని గ్రామీణ స్థానిక సంస్థల కోసం 15వ ఆర్థిక సంఘం గ్రాంట్స్ విడుదల చేసింది. ఈ గ్రాంట్స్ కింద ఆంధ్రప్రదేశ్ రాష్ట్రానికి 446.49 కోట్లు నిధులు విడుదల చేశారు. అలాగే ఉత్తరప్రదేశ్‌కు రూ.1598.80 కోట్లు విడుదల చేశారు. గ్రామీణ ప్రాంతాల అభివృద్ధి, స్థానిక పరిపాలన కోసం ఈ నిధులను వినియోగించనున్నారు.

ఈ ఆర్థిక సంవత్సరానికి సంబంధించిన రెండో విడత కింద ఆంధ్రప్రదేశ్‌కు ఈ నిధులు విడుదల చేసినట్లు కేంద్ర పంచాయతీరాజ్ మంత్రిత్వ శాఖ వెల్లడించింది. రెండో విడత గ్రాంట్ రూ.420.99 కోట్లతో పాటుగా, మొదటి విడత గ్రాంట్‌లోని రూ.25.49 కోట్లు కలిపి.. రూ.446.49 కోట్లు విడుదల చేసినట్లు తెలిపింది. ఆంధ్రప్రదేశ్‌లోని 13,097 గ్రామ పంచాయితీలు, 650 మండల పరిషత్‌లు, 13 జిల్లా పరిషత్‌లకు ఈ నిధులు కేటాయించినట్లు పంచాయతీరాజ్ శాఖ వెల్లడించింది. పంచాయతీరాజ్ మంత్రిత్వశాఖ, జలశక్తి మంత్రిత్వ శాఖ సిఫార్సు చేసిన మేరకు ఏటా రెండు విడతలుగా ఈ గ్రాంట్లను విడుదల చేస్తారు.

రాజ్యాంగంలోని 11వ షెడ్యూల్ కింద ఈ నిధులను కేటాయిస్తారు. ఆర్థిక సంఘం విడుదల చేసే అన్‌టైడ్ గ్రాంట్లను వేతనాలు మినహా మిగతా అభివృద్ధి కార్యక్రమాలకు ఉపయోగించుకోవచ్చు. అలాగే టైడ్ గ్రాంట్లను పారిశుద్ధ్యం, ఓడీఎఫ్ పనులు, నీటి నిర్వహణ, వర్షపు నీటి పునర్వియోగం, వాటర్ రీసైక్లింగ్ వంటి కార్యక్రమాలకు ఉపయోగించవచ్చు. గ్రామీణ ప్రాంతాల్లో మౌలిక సదుపాయాల కల్పనకు ఈ నిధులను వినియోగిస్తుంటారు. ఈ ఆర్థిక సంవత్సరానికి సంబంధించి ఇప్పటికే ఒక విడతగా 15వ ఆర్థిక సంఘం నిధులు విడుదల అయ్యాయి. సెప్టెంబర్ నెలలో రాష్ట్రంలోని పంచాయతీలు, జిల్లా, మండల పరిషత్‌లకు కేంద్ర ప్రభుత్వం 15వ ఆర్థిక సంఘం నిధులు రూ.989 కోట్లు విడుదల చేసింది. తాజాగా రెండో విడత నిధులను విడుదల చేసినట్లు కేంద్ర పంచాయతీరాజ్ శాఖ వెల్లడించింది.