by Suryaa Desk | Sun, Dec 14, 2025, 10:40 PM

వ్యక్తిగత ఆదాయపు పన్ను చెల్లించే వారికి అలర్ట్. మీరు చెల్లించాల్సిన మూడో విడత అడ్వాన్స్ ట్యాక్స్ గడువు డిసెంబర్ 15, 2025తో ముగుస్తోంది. మీరు ఇంకా చెల్లించనట్లయితే వెంటనే ఈ పని పూర్తి చేయండి. ట్యాక్స్ పేయర్లు తమ ట్యాక్స్ లయబిలిటీని ఓసారి పునఃసమీక్షించుకుని తాము చెల్లించే పన్ను రూ.10 వేలు దాటుతుంది అనుకుంటే కచ్చితంగా అడ్వాన్స్ రూపంలో చెల్లించాల్సి ఉంటుంది. మూడో విడతలో 75 శాతం ట్యాక్స్ పూర్తి చేయాల్సి ఉంటుంది. లేదంటే పన్ను బకాయిలపై భారీగా పెనాల్టీలు, వడ్డీలు కట్టాల్సి వస్తుంది. మరి ఆ వివరాలు తెలుసుకుందాం.

టీడీఎస్, టీసీఎస్ వంటి మినహాయింపులు తీసి వేసిన తర్వాత ఒక ఏడాదిలో చెల్లించాల్సిన పన్ను రూ.10,000 దాటిన వారందరూ తమ ట్యాక్స్ అడ్వాన్స్ రూపంలో చెల్లించాల్సి ఉంటుంది. మొత్తం ఒకేసారి కాకుండా నాలుగు విడతల్లో చెల్లించేందుకు కేంద్ర ప్రభుత్వం అవకాశం కల్పిస్తోంది. డిసెంబర్ 15వ తేదీ నాటికి 75 శాతం పన్ను కట్టి ఉండాలి. లేదంటే పెనాల్టీలు పడతాయి. ఆదాయపు పన్ను చట్టంలోని సెక్షన్ 234సీ ప్రకారం పన్ను బకాయిలపై వడ్డీ నిర్ణయిస్తారు. ఇచ్చిన గడువులోపు కట్టని వారికి అడ్వాన్స్ ట్యాక్స్ బకాయిలపై నెలకు 1 శాతం వడ్డీ పడుతుంది. ఇది మూడు నెలలకు చెల్లించాల్సి వస్తుంది. గత మూడు విడతలతో పాటు వచ్చే మార్చి విడతకు సైతం 1 శాతం వడ్డీ అదనంగా చెల్లించాల్సి వస్తుంది. అంటే ఇక్కడ డబుల్ పెనాల్టీ కట్టాల్సి వస్తుందని ఆర్థిక నిపుణులు చెబుతున్నారు.

క్యాపిటల్ గెయిన్స్, లాటరీ, డివిడెండ్ ఇన్‌కమ్ అనేది ముందస్తుగా లెక్కించేందుకు కుదరదు కాబట్టి వాటిని అడ్వాన్స్ ట్యాక్స్ నుంచి మినహాయిస్తారు. అయితే, మార్చి 31 నాటికి మొత్తం ట్యాక్స్ చెల్లించాల్సి ఉంటుంది. అయితే, సెక్షన్ 234సీ ప్రకారం అంచనా వేయలేని ఆదాయాలపై ఎలాంటి వడ్డీ ఉండదు. అలాంటి ఆదాయం వచ్చినప్పుడు తదుపరి విడతలో మొత్తం ట్యాక్స్ చెల్లించాల్సి ఉంటుంది. అడ్వాన్స్ ట్యాక్స్ కేటగిరీలోని చలాన ITNS 280 ద్వారా ఆన్‌లైన్ ద్వారా అడ్వాన్స్ ట్యాక్స్ చెల్లించాల్సి ఉంటుంది.

మరోవైపు.. ఆర్థిక సంవత్సరం ముగిసే నాటికి ట్యాక్స్ పేయర్లు 90 శాతం పన్ను చెల్లించి ఉండకపోతే సెక్షన్ 234బీ అనేది అప్లై అవుతుంది. దీంతో ఏప్రిల్ 1 నుంచి అసెస్మెంట్ ఇయర్ మొత్తం నెలకు 1 శాతం చొప్పున వడ్డీ కట్టాల్సి వస్తుంది. ఉదాహరణకు ఆర్థిక సంవత్సరం 2025-26లో సెక్షన్ 234బీ కింద చెల్లించాల్సిన వడ్డీ అనేది ఏప్రిల్ 1, 2026 నుంచి అమలులోకి వస్తుంది. అలాగే బిజినెస్, వృత్తిపరమైన ఆదాయం లేని సీనియర్ సిటిజన్లకు అడ్వాన్స్ ట్యాక్స్ నుంచి మినహాయింపు ఉంటుంది. తమ ఆదాయంపై టీడీఎస్ సరిగ్గా మినహాయించారని ధ్రువీకరించుకోవాల్సి ఉంటుంది.