by Suryaa Desk | Sun, Dec 21, 2025, 07:20 PM

కిరాక్ ఆర్పీ.. ఓ కామెడీ షో ద్వారా ఫేమస్ అయిన స్టాండప్ కమెడియన్.. ఆ తర్వాత పలు షోలలో కనిపించిన కిరాక్ ఆర్పీ.. ఇటీవల పొలిటకల్ టర్న్ తీసుకున్నారు. 2024 ఆంధ్రప్రదేశ్ అసెంబ్లీ ఎన్నికల ముందు నుంచి కిరాక్ ఆర్పీ ఏపీ రాజకీయాల్లో యాక్టివ్‌గా ఉన్నారు. నాటి ఎన్నికల్లో తెలుగుదేశం పార్టీ తరుఫున ప్రచారం కూడా నిర్వహించారు. ఈ క్రమంలోనే తెలుగుదేశం పార్టీకి మద్దతుగా.. వైసీపీపై ఓ రేంజులో విరుచుకుపడుతూ సోషల్ మీడియాలో నానుతూ ఉంటారు కిరాక్ ఆర్పీ. ముఖ్యంగా మాజీ మంత్రి, వైసీపీ నేత ఆర్కే రోజా.. కిరాక్ ఆర్పీ మధ్య మాటల యుద్ధం అప్పట్లో ఓ రేంజులో సాగింది. ఓ షోలో వీరిద్దరూ కలిసి పాల్గొన్నప్పటికీ.. పొలిటికల్‌గా మాత్రం వీరి మధ్య పచ్చ గడ్డి వేసినా భగ్గుమనే పరిస్థితి. అలాగే వైసీపీ నేత బైరెడ్డి సిద్ధార్థ్ రెడ్డిపైనా ఆర్పీ విరుచుకుపడుతుంటారు.

ఈ క్రమంలోనే కిరాక్ ఆర్పీ.. బైరెడ్డి సిద్ధార్థ్ రెడ్డికి సవాల్ విసురుతున్న వీడియో ఒకటి సోషల్ మీడియాలో వైరల్ అవుతోంది. ఓ ఇంటర్వ్యూలో పాల్గొ్న్న కిరాక్ ఆర్పీ.. రాష్ట్రంలోని అన్ని శాసనసభ నియోజకవర్గాల పేర్లను గుక్క తిప్పుకోకుండా టకటకా చెప్పేశారు. ఏపీలోని శాసనసభ నియోజకవర్గాల పేర్లను కిరాక్ ఆర్పీ కేవలం2 నిమిషాల వ్యవధిలోనే టక టకా చెప్తున్న వీడియో సోషల్ మీడియాలో వైరల్ అవుతోంది. అన్ని పేర్లను గుక్కతిప్పుకోకుండా చెప్పేసిన కిర్రాక్ ఆర్పీ.. వైసీపీ నేత బైరెడ్డి సిద్ధార్థ్ రెడ్డికి దమ్ముంటే ఇలా చెప్పాలని ఛాలెంజ్ చేశారు. మరోవైపు ఈ వీడియో నెట్టింట వైరల్ అవుతుండగా.. నెటిజనం భిన్నరకాలుగా కామెంట్లు పెడుతున్నారు. ఏమో అనుకున్నాం కానీ.. మనోడిలో మ్యాటర్ ఉందంటూ కామెంట్స్ చేస్తున్నారు.

మరోవైపు చంద్రబాబు విజన్ , నారా లోకేష్ మీద అభిమానంతోనే టీడీపీ కోసం పనిచేస్తున్నట్లు కిరాక్ ఆర్పీ చెప్తుంటారు. వారి మీద అభిమానంతోనే తన కుటుంబసభ్యులను లక్ష్యంగా చేసుకుని తిడుతున్నప్పటికీ.. బెదిరిస్తున్నప్పటికీ భయపడకుండా ముందుకెళ్తున్నట్లు ఇటీవల ఓ ఇంటర్వ్యూలో కిరాక్ ఆర్పీ చెప్పుకొచ్చారు.

ఏ పదవి ఆశించి తాను టీడీపీ కోసం పనిచేయడం లేదని.. కష్టపడితే పదవులు వాటంతట అవే వస్తాయని చెప్తున్నారు. అలాగే తన జీవితం మొత్తం టీడీపీకి అంకితం చేశానంటున్న కిర్రాక్ ఆర్పీ.. ఆ తర్వాతే కమెడియన్, వ్యాపారాలు అన్నీ అని చెప్తున్నారు. పార్టీ కోసం పనిచేయడం తప్ప పార్టీ నుంచి ఏమీ ఆశించడం లేదని ఇటీవల ఓ ఇంటర్వ్యూలో చెప్పుకొచ్చారు.