ఐపీఎల్ ఫ్యాన్స్‌కు టీఎస్‌ఆర్టీసీ గుడ్ న్యూస్.. ఉప్పల్ స్టేడియంకు స్పెషల్ బస్సులు

దేశంలో పొట్టి క్రికెట్ మజా నడుస్తోంది. ఈ క్రమంలోనే హైదరాబాద్‌లో కూడా మ్యాచ్‌లు జరుగుతున్నాయి. సన్ రైజర్స్ హైదరాబాద్ 

హోం గ్రౌండ్‌లో ఇప్పటికే ఓ మ్యాచ్‌ జరగ్గా.. తొలి మ్యాచ్‌లో సిక్సుల వరదతో అభిమానులను ఉర్రూతలూగించింది. కాగా.. ఈరోజు చెన్నై సూపర్ కింగ్స్‌ తో తలపడుతోంది. కాగా.. నగరంలోని ఐపీఎల్‌ ఫ్యాన్స్‌కు టీఎస్‌ఆర్టీసీ గుడ్ న్యూస్ చెప్పింది. హైదరాబాద్‌లో ఉప్పల్ స్టేడియం వేదికగా ఎస్సార్‌హెచ్ వర్సెస్ చెన్నై సూపర్ కింగ్స్ మ్యాచ్ జరగనున్న నేపథ్యంలో ఆర్టీసీ యాజమాన్యం కీలక నిర్ణయం తీసుకుంది. ఉప్పల్ స్టేడియంలో జరిగే ఈ మ్యాచ్ కోసం వివిధ ప్రాంతాల నుంచి తరలివచ్చే క్రికెట్ అభిమానులను దృష్టిలో పెట్టుకుని.. గత మ్యాచ్‌కు వచ్చిన ఫ్యాన్స్ సంఖ్యను పరిగణలోకి తీసుకుని.. ప్రత్యేక బస్సులు నడపాలని నిర్ణయించుకుంది.

నగర నలుమూల నుంచి ఉప్పల్ స్టేడియానికి ఆర్టీసీ ప్రత్యేక బస్సులు ఏర్పాటు చేసింది. ఈ మేరకు గ్రేటర్ హైదరాబాద్ జోన్ ఈడీ వి. వెంకటేశ్వర్లు ఒక ప్రకటన విడుదల చేశారు. హైదరాబాద్ వ్యాప్తంగా 24 డిపోల నుంచి మొత్తం 60 బస్సులను నడుపుతామని.. సాయంత్రం 6 గంటల నుంచి రాత్రి 11.30 గంటల వరకు అందుబాటులో ఉంటాయని వెంకటేశ్వర్లు పేర్కొన్నారు. బస్సు సౌకర్యాల కల్పనతో క్రికెట్ మ్యాచ్ కోసం వచ్చే ప్రయాణికులకు ప్రయాణం సులభతరం అవటమే కాకుండా.. ట్రాఫిక్ సమస్య కూడా తగ్గే అవకాశం ఉంది.

నేడు.. చెన్నై సూపర్‌ కింగ్స్‌తో సన్‌రైజర్స్‌ హైదరాబాద్‌ మధ్య ఉప్పల్ స్టేడియంలో కీలక మ్యాచ్ జరగనుండగా.. క్రేజ్ ఏర్పడింది. గత మ్యాచ్‌లో పరుగుల వరద పారగా.. నేటి మ్యా్చ్‌లో కూడా సిక్సుల మోత మోగనుందా అన్న ఉత్కంఠ రేపుతోంది. ఈ మ్యా్చ్‌కు క్రికెట్ అభిమానులు పెద్ద ఎత్తున తరలి వచ్చే అవకాశం ఉంది. ఈ నేపథ్యంలోనే.. అందివచ్చిన అవకాశాన్ని సద్వినియోగం చేసుకునేలా ఆర్టీసీ కీలక నిర్ణయం తీసుకుంది. మ్యాచ్ కోసం బస్సులు నడపడం వలన సంస్థకు ఆదాయం కూడా పెరుగుతుందని యాజమాన్యం భావిస్తోంది.

 టీఎస్ ఆర్టీసీ తీసుకున్న ఈ నిర్ణయం ఫ్యాన్సుకు కూడా బాగానే కలిసిరానుంది. సొంత వాహనాలపై వెళ్తే.. పార్కింగ్ అని, ఆ పార్కింగ్ ఫీజులంటూ, ట్రాఫిక్‌లో ఇబ్బంది పడే బదులు.. ఎంచక్కా బస్సు ఎక్కితే.. హాయిగా స్టేడియంకు వెళ్లి హ్యాపీగా మ్యాచ్ ఎంజాయ్ చేయొచ్చు. మళ్లీ మ్యాచ్ అయ్యాక.. బస్సు ఎక్కితే.. ఇంటికి చేరుకోవచ్చు. పార్కింగ్ ఇబ్బందులు, ట్రాఫిక్ కష్టాల నుంచి తప్పించుకునేందుకు ఇది బంపర్ ఆఫర్ అన్నట్టే.