నాంపల్లిలో మల్టీ లెవల్ కారు పార్కింగ్ కాంప్లెక్స్.. కేటీఆర్ ఇంట్రెస్టింగ్ ట్వీట్

విశ్వనగరంగా హైదరాబాద్‌ నగరం అభివృద్ధి చెందుతోంది. గత ప్రభుత్వం నగరంలో కొత్తగా ఫ్లైఓవర్లు, రోడ్లు, అండర్‌పాసులు నిర్మించింది. రేవంత్ ప్రభుత్వం కూడా నగర అభివృద్ధిపై ప్రత్యేక దృష్టి పెట్టింది. నగరంలో పార్కింగ్ ప్రధాన సమస్య. ఈ నేపథ్యంలో గత ప్రభుత్వం నాంపల్లి మెట్రో స్టేషన్ పక్కన మల్టీ లెవల్ కారు పార్కింగ్ కాంప్లెక్స్ నిర్మాణానికి శంకుస్థాపన చేసింది. త్వరలోనే ఈ కాంప్లెక్స్ అందుబాటులోకి రానున్నట్లు హైదరాబాద్ మెట్రో రైల్ ఎండీ ఎన్వీఎస్ రెడ్డి ఇటీవల ప్రకటించారు. అత్యాధునిక వసతులతో ఈ కాంప్లెక్స్ నిర్మించారు. ప్రభుత్వ ప్రైవేట్ భాగస్వామ్యంతో సుమారు రూ.80 కోట్లు వెచ్చించి ఈ కాంప్లెక్స్ నిర్మాణం చేపట్టారు. మెస్సర్స్ భారీ ఇన్ఫ్రా ప్రైవేటు లిమిటెడ్ కంపెనీ ప్రాజెక్టును నిర్మించింది.

దేశంలోనే ప్రప్రథమంగా జర్మన్ పాలిస్ పార్కింగ్ విధానంలో తక్కువ స్థలంలో ఎక్కువ వాహనాలు పార్కింగ్ చేసేలా ఆ కాంప్లెక్స్‌ను ప్రాజెక్ట్ను రూపొందిచారు. అర ఎకరం స్థలంలో 15 అంతస్తులుగా నిర్మాణం చేపట్టారు. అందులో 10 అంతస్తుల్లో వాహనాల పార్కింగ్‌కు కేటాయించగా.. మిగిలిన 5 అంతస్తుల్లో కమర్షియల్ దుకాణాలు, రెండు స్కీన్లతో ఒక సినిమా థియేటర్ నిర్మించారు. పార్కింగ్ ప్రదేశాల్లో 250 కార్లు, 200 ద్విచక్రవాహనాలు పార్క్ చేసే అవకాశం ఉంది. రూపొందించిందని వెల్లడించారు. కొవిడ్ తీవ్రత, డెట్ ఫైనాన్సింగ్ సమస్యలు, గ్లోబల్ సప్లయ్ చైన్ అంతరాయాల వల్ల ప్రాజెక్టు నిర్మాణంలో జాప్యమైందని గతంలో అధికారులు స్పష్టం చేశారు.

తాజాగా.. ఈ కారు పార్కింగ్ ప్రాజెక్టుపై మాజీ మంత్రి కేటీఆర్ ఇంట్రెస్టింగ్ ట్వీట్ చేశారు. 2016/17 ఏడాదిలో పీపీపీ విధానంలో పైలట్ ప్రాజెక్టుగా ఎంఎల్సీపీ (మల్టీ లెవల్ కార్ పార్కింగ్) ప్రాజెక్ట్‌ను ప్రారంభించినట్లు చెప్పారు. కొన్ని కారణాల వల్ల ఆలస్యమైనప్పటికీ.. చివరకు చక్కగా రూపుదిద్దుకున్నందుకు ఆనందంగా ఉందన్నారు. రేవంత్ నేతృత్వంలోని కాంగ్రెస్ ప్రభుత్వం దీనిని ముందుకు తీసుకెళ్తుందని ఆశిస్తున్నట్లు వెల్లడించారు. తాము అనుకున్నట్లుగా నగరంలోని కీలకమైన జంక్షన్లు, మెట్రో స్టేషన్లు, వాణిజ్య కేంద్రాల్లో మరిన్నీ మల్టీ లెవల్ కారు పార్కింగ్ కాంప్లెక్స్‌లు అందుబాటులోకి తీసుకొస్తారని తాము ఆశిస్తున్నట్లు కేటీఆర్ వెల్లడించారు.