మంత్రిగా పవన్ ప్రమాణస్వీకారం.. కేంద్రమంత్రి బండి సంజయ్ స్పెషల్ ట్వీట్
Telangana Telugu | Suryaa Desk | Published : Wed, Jun 12, 2024, 07:32 PM
ఆంధ్రప్రదేశ్లో నూతన ప్రభుత్వం కొలువుదీరింది. టీడీపీ అధినేత చంద్రబాబు ముఖ్యమంత్రిగా ప్రమాణ స్వీకారం చేశారు. చంద్రబాబుతో పాటు 24 మంది కూటమి ఎమ్మెల్యేలు మంత్రులుగా ప్రమాణస్వీకారం చేశారు. పిఠాపురం నుంచి తొలిసారి ఎమ్మెల్యేగా ఎన్నికైన జనసేన అధ్యక్షుడు పవన్ కల్యాణ్ మంత్రిగా ప్రమాణస్వీకారం చేశారు.
ఇక ఈ కార్యక్రమంలో ప్రధాని నరేంద్ర మోదీ, పలువురు కేంద్ర మంత్రులు సహా సినీ, రాజకీయ ప్రముఖులు హాజరయ్యారు. తెలంగాణ నుంచి కేంద్ర హోంశాఖ సహాయ మంత్రి బండి సంజయ్, కేంద్ర బొగ్గు గనుల శాఖ మంత్రి కిషన్ రెడ్డి, బీజేపీ ఎంపీ ఈటల రాజేందర్ ప్రమాణస్వీకార కార్యక్రమంలో పాల్గొన్నారు. ఈ సందర్భంగా మంత్రిగా ప్రమాణస్వీకారం చేసిన పవన్కు బండి సంజయ్ శుభాకాంక్షలు తెలిపారు. ట్విట్టర్ వేదికగా స్పెషల్ విషెస్ చెప్పారు.
మీ పట్టుదల, సంకల్పమే మీకు ఈ విజయాన్ని అందించాయని అన్నారు. మీరు ఇలాగే ఎదగాలని.. విజయవంతం కావాలని ఆకాంక్షిస్తున్నానని సంజయ్ ట్వీట్ చేశారు. కేంద్రంలో ప్రధాని నరేంద్ర మోదీ నాయకత్వంలో, రాష్ట్రంలో చంద్రబాబు సారథ్యంలో ఏపీ భవిష్యత్తు ఉజ్వలంగా ఉండనుందన్నారు. ఎన్డీయే ప్రభుత్వ హయాంలో ఏపీ ప్రగతికి ఎలాంటి ఢోకా లేదు అంటూ బండి సంజయ్ ట్వీట్ చేశారు. ఇక ముఖ్యమంత్రిగా ప్రమాణస్వీకారం చేసిన చంద్రబాబుకు కూడా సంజయ్ శుభాకాంక్షలు తెలిపారు. నరేంద్ర మోదీ నాయకత్వంలో ఆంధ్రప్రదేశ్ అద్భుతమైన అభివృద్ధి సాధిస్తుందని అన్నారు.
|
|